Gobièrnu

Riba 10 di mei 2017 e partidonan PAR, MAN i PIN a firma e akuerdo di gobernashon “Realisando e máksimo potensial di Kòrsou”, un akuerdo di gobernashon ku atenshon spesial pa edukashon, formashon i kombatimentu di pobresa.

Ku esaki e partidonan a enfatisá ku Kòrsou ta un país fuerte ku yen oportunidat, ku den e periodo 2017-2021 lo desaroyá na bienestar di nos komunidat.

E Programa di Gobernashon, ku tin e mesun titulo, ta ekspandé riba e prioridatana di e gabinete pa duna empuhe na ekonomiá i mehorá e situashon sosial.  E gobiernu ta para fuerte pa bon gobernashon i maneho di finansas pa segurá konfiansa den nos pais, pa stimulá kresementu di ekonomia i pa p’asina por invertí den tur lokual ta importante pa suidadanonan i logra un komunidat den balansa. 

Na e momentunan aki pobresa ta un di e problemanan agudo riba nos isla. Kombatimentu di pobresa den bario, desaroyo di proyektonan pa krea kupo di trabou i entrada i stimulá desaroyo duradero ta prioridat primordial pa e gabinete aki. 

Pa por atende ku e retonan ku nos pais ta enfrentá i  subi un rumbo nobo, mester realisá kolaborashon efektivo entre gobièrnu, sektor públiko i privá, organisashonnan no-gubernamental i suidadanonan. Kolaborashon ta krusial pa logra resultado kompartí. 

E Programa di Gobernashon ta punto di salida di gobièrnu i ta indiká e direkshon ku nos kier bai pa logra un komunidat inklusivo i bon eduká kaminda suidadanonan ta partisipá áktivo pa logra desaroyo duradero.

Konseho di minister

 

 

Sinta robes pa drechi: Sra. Zita Jesus-Leito, Sr. Eugene Rhuggenaath, Sra Susanne Camilia-Romer.
Pará robes pa drechi: Sr. Armin Konket, Sr. Quncy Girigorie, Sra. Marilyn Alcalá-Wallé, Sr. Steven Martina, Sr. Kenneth Gijsbertha i Sr. Hensley Koeiman. 

Konseho di Minister ta reúni tur siman riba djarason na e Edifisio Prinsipal (Hoofdgebouw) na Fort Amsterdam pa deliberá riba dokumentunan tokante di maneho di gobièrnu. Durante di e reunionnan, nan ta tuma desishon den e aria di e nuebe ministerionan di gobièrnu. Ta manda e desishonnan di konseho di minister na e departamentunan di gobernashon konserní pa implementashon. Den sierto kaso, a base di e índole di e desishonnan, ta stipulá e desishonnan den un landsbesluit  i despues ta manda e besluit pa Gobernador. Tur siman tin konferensha di prensa riba djaweps. Den e konferensha di prensa e ministernan ta haña oportunidat pa informá pueblo di Korsou tokante di e situashon di un tópiko.

Programa di Gobernashon

E programa di Gobernashon ta ilustrá e futuro ku kier logra pa Kòrsou. E gobièrnu aki kier logra 4 meta stratégiko. 

Komunidat inklusivo

Un komunidat inklusivo ta un komunidat ku no ta laga niun hende atras i kaminda kada persona ku nan nesesidatnan ta importante. Tur persona mester haña oportunidat amplio pa desaroyá den nos komunidat, sin importá aspektonan personal. Lo tin atenshon pa diversidat i pa kombatí eksklushon di tur forma den nos komunidat.

Suidadania aktivo

Partisipashon aktivo di suidadanonan ta referí na meta pa stimulá embolbimentu di un i tur i tambe e kapasidat pa kada hende yuda su mes i yuda kontribuí na un mihó Kòrsou. Esei kiermen tambe embolbimentu demokratiko di personanan na desishonan riba diferente nivel.

Un komunidat eduká i formá 

Un komunidat eduká ta nifiká ku tur persona, for di mucha, hóben te na adulto mester haña oportunidat pa risibí enseñansa di nivel haltu ku ta tene kuenta ku e diferensia entre persona, desaroyonan modèrno i ta konektá ku demanda di merkado.

Desaroyo duradero

Desaroyo duradero  lo sòru pa bienestar pa e generashon aktual sin perhudiká e siguiente generashonnan. Desaroyo duradero ta mantené un balansa entre kresementu ekonómiko, progreso sosial i ekologia.
 

Pa gobièrnu realisá su vishon i metanan stratégiko lo desaroyá maneho i aktividatnan riba e siguiente 5 temanan sentral: 

Enseñansa, edukashon i formashon

Tur suidadano tin derechi i mester tin e siguransa ku e por desaroyá konforme su abilidatnan p’asina e por tin mas oportunidat riba un bida digno. Den kuadro di e tema aki tin atenshon pa enseñansa di kalidat i un sistema di enseñansa ku ta tene kuenta ku 21st century skills i lifelong learning.

Ekonomia i Trabou

Tur hende tin derechi di biba un bida kaminda e por provée den su nesesidatnan básiko manera kuminda, bibienda, seguridat, akseptashon sosial i desaroyo propio. P’esei desaroyo duradero ta nesesario i kada persona mester por haña of krea trabou digno. 

Salù i medioambiente

Komunidat mester tin akseso na un sistema di salubridat integrá, efektivo i adekuá. Lo invertí mas den prevenshon di malesa i pa drecha efektividat di kuido. Pa ku medio ambiente lo desaroyá un vishon pa krea mas balansa ekológiko kaminda mas hende por produsí nan mes kuminda i ta konsiente di e balor i limitashonnan di nos rekursonan natural. 

Famia, Komunidat i Seguridat

Bario ta un instrumento pa logra desaroyo duradero di un komunidat. Lo buta énfasis riba mitigá e retraso sosial ku enfoke spesial riba famianan ku ta den situashon agudo. E aserkamentu aki lo mester drecha e situashon di seguridat i òrdu den barionan i promové koheshon sosial i union. 

Bon gobernashon

Ta nesesario pa restourá e konfiansa di komunidat den gobièrnu i aparato públiko, dor di krea transparensia i dor di mantené bon gobernashon, bon maneho di finansas i integridat.Banda di kapasitashon di aparato públiko, lo buska maneranan pa optimalisá servisio dor di inovashon i uso di teknologia modèrno.

 
Bo opinion