Notisia

Gobièrnu di Kòrsou a yuda pasaheronan pegá pa sali for di Repúblika Dominikana

Geplaatst op 6 Febrüari 2018 dor Ministerio di Asuntunan General i Promé Minister

WILLEMSTAD – Awe, djamars 6 di febrüari 2018, un grupo di pasahero ku a keda pegá na Repúblika Dominikana, ta regresá Kòrsou. Nan ta entre e par di shen pasahero ku a keda atras, despues ku diripiente PAWA airlines di Repúblika Dominikana mester a para su buelonan riba òrdu di outoridatnan Dominikano, pa motibu di debenan haltu. Esaki a kousa hopi ínkomodidat pa basta pasahero, sigur pa esnan sin sufisiente fondo ni famia ku por a yuda
finansieramente.

Ministerio di Asuntunan General - bou di guia di promé minister Eugene Rhuggenaath i ku kordinashon di Directie Buitenlandse Betrekkingen (DBB) - a keda diariamente den kontakto ku pasahero, Embahada di Reino na Repúblika Dominikana i outoridat di aviashon (JAC) di e pais, pa asina buska maneranan pa e pasaheronan por a bula mas lihé posibel pa Kòrsou.

Den e dianan ku a pasa, 217 di e pasaheronan por a sali riba buelonan ku outoridatnan di Repúblika Dominikana a regla. Sierto hende si a regresá riba nan mes forsa, kumprando un pasashi nobo serka otro kompanianan di aviashon. Un total di 104 persona ku tabata registrá serka JAC, awe a haña oportunidat pa regresá Kòrsou. E avion ta unu di Sunrise Airways ku ta di charter dor di Kòrsou, ku yudansa di Ofisina di Turismo. Gobièrnu ta brinda e oportunidat aki, apesar ku esaki ta responsabilidat di e kompania di aviashon, PAWA, ku a bende pasashi ku e hendenan aki i tambe di e
pasaheronan mes.

Gobièrnu di Kòrsou ta konsehá tur hende ku ta biaha bai un otro pais pa motibunan di vakashon, bishita familiar, bishita na dòkter òf kualke otro motibu, pa sera un seguro di biahe. Tambe ta importante pa tuma kontakto mésora ku e embahada òf konsulado di Reino Hulandes, den kasonan di emergensia. Asina ta bira mas fásil pa sikiera keda na altura di posibel yudansa di instanshanan, ora esaki ta nesesario. Riba página di Facebook di Gobièrnu di Kòrsou ta publiká e informashon mas aktual.

Ministerio konserní

Bo opinion