Notisia

Ministerio di GMN ta felisitá tur Enfermera i Enfermero awe riba Dia Internashonal di Enfermeria

Geplaatst op 16 Mei 2018 dor Ministerio di Salubridat Públiko, Medio Ambiente i Naturalesa

E aña aki e tema di Dia di Enfermeria ta: ‘Un bos ku ta guia- salubridat ta un derecho humano’. E fecha di awe ta marka e fecha di nasementu di fundador di enfermeria moderno, Florence Nightingale. Ta p’esei, rònt mundu, awe dia 12 di mei ta para ketu riba e fecha aki i mundu di enfermeria ta selebrá esaki. Aki na Kòrsou no ta diferente, kaminda nos ta para ketu riba e trabou ku Enfermeronan ta hasi. Tur aña di nobo tin konferenshanan internashonal, kaminda ta selebrá e Dia Internashonal di Enfermeria, kaminda ta para ketu riba e kontribushon ku un Enfermero ta duna na sosiedat rònt mundu.

E fecha di awe tin un signifikashon fuerte, ya ku e ta e fecha di nasementu di talbes un dje Enfermeronan di mas famoso na mundu, esta Florence Nightingale. E dia internashonal ta keda uzá pa selebrá ku tur Enfermera i Enfermero na mundu ku ta yuda pashèntnan ku ta sufriendo di diferente malesa. Enfermera i Enfermeronan ta duna servisio i ta yuda fasilitá pa e pashènt por haña e kuido apropiá pa kualkier malesa ku e ta sufriendo di dje. Enfermera i Enfermeronan ta esnan ku ta generá tur informashon di pashèntnan i ta esnan ku ta trata e pashèntnan mas direkto ku tur otro hende.

Dia Internashonal di Enfermeria ta e dia ku mundu ta para ketu pa duna honor i rèspèt na e Enfermera i Enfermeronan di rònt mundu, pa nan trabounan honorabel i tambe inkreibel. Tin hopi Enfermera i Enfermero ku ta traha warda di anochi, komo tambe den dia. Enfermera i Enfermeronan ta esnan ku ta yuda e pashènt pa bira bon mas lihé, pa e fasilidat ku nan ta duna na e pashènt.
Awe dia 12 di mei 2018, na Kòrsou tambe nos tin diferente Florence Nighingale, pasobra nos sa ku e atenshon, e dedikashon i e amor ku kada un Enfermera i Enfermero di Kòrsou ta duna, ta un aporte sigur pa yuda e pashènt. Ministerio di Salú, Medio Ambiente i Naturalesa awe tambe ta uni su mes pa manda un palabra di felisitashon pa tur Enfermera i Enfermero di Kòrsou awe riba nan dia.

Huntu nos mester traha pa sigui mehorá kuido aki na Kòrsou. Kòrsou su Enfermera i Enfermeronan a demostrá ku nan ta di un kalidat haltu i demostrá ku nos no ta baha kabes pa ningun otro pais.

Pabien na tur Enfermera i Enfermero di Kòrsou riba Dia Internashonal di Enfermeria 2018.    

Nurse day 2018

 

                                                              ###

Ministerio konserní

Bo opinion