Labor & Negoshi

Labor & negoshi

Kuminsá bo propio negoshi no ta nada fásil. Pa e motibu aki kada konseho ku bo por risibí riba e tópiko aki lo ta di gran ayudo.

Ministerio di Desaroyo Ekonómiko ke enkurashá nos hendenan mas tantu posibel pa lanta empresanan chikí i mediano duradero aki na Kòrsou. Ta trata aki di empresanan ku e mentalidat korekto pa trese inovashon i mehoransa na Kòrsou. Mas empresa duradero i formal na Kòrsou ta nifiká tambe un kresementu den e ekonomia lokal i mas ku klaro mas kuponan di trabou.

Bo ta kana un temporada kaba ku e idea pa lanta un negoshi propio pero bo no sa na unda pa kuminsá?

Aki ta sigui 10 paso pa yuda bo realisá bo soño di bira un empresario

10 paso pa kuminsá bo propio empresa

1. Kuminsá ku un ekselente business plan

Laga nos kuminsá! Kada empresa ta kuminsá ku un vishon i un plan. Promé paso pues pa lanta un empresa eksitoso ta detayá bo vishon i plan riba papel.
Bo business plan ta un elaborashon amplio di bo ideanan, pero tambe bo plan di akshon pa futuro. Un bon business plan despues ta nesesario tambe si akaso bo mester hasi petishon pa sosten finansiero pa bo empresa.

2. Traha un bista finansiero realístiko!

Pa kuminsá un empresa en todo kaso bo mester di kapital. SI bo no tin sufisiente. Si akaso bo no tin sufisiente kapital propio lo bo mester hasi un petishon pa haña finansiamentu. Bankonan no ta e úniko posibilidat di finansiamentu ku ta eksistí den kaso ku bo ta lantando un negoshi, en realidat tin otro opshonnan manera por ehèmpel bankonan di desaroyo (manera CDI en Korpodeko).

 Aparte di e alternativanan aki tin tambe alternativanan mas nobo i kreativo manera crowdfunding. Tene na kuenta ku bo no ta mará na skohe solamente un di e tipo di finansiamentunan disponibel. Un kombinashon tambe ta posibel.

3. Skohe un struktura hurídiko

E struktura hurídiko ku ta kuadra ku bo empresa ta dependé di:

              *Bo situashon spesífiko,
              *E produkto òf servisio ku lo bo ta ofresé,
              *E meta di bo empresa,
              *Si akaso bo ta bai kuminsá e empresa bo so òf ku mas partner i
              *Si bo ke operá solamente lokal so òf internashonal tambe. 

Algun aspekto sumamente importante pa tene na kuenta na momentu di skohe un struktura hurídiko pa bo empresa ta e benefishinan di impuesto i e pasivonan ku ta bini ku kada struktura.

4.  Duna bo empresa un nòmber úniko

E nòmber di bo empresa mester ta úniko, diferente i “catchy” den bo brènch i region. Skohe un nòmber ku ta kla i komprendibel pero tambe fásil sufisiente pa e hasi un impakto serka bo grupo di enfoke. Mas ku klaro ta konsehabel pa e nòmber ku bo skohe ta pas tambe ku e aktividatnan primario ku bo empresa lo ta ehersé.

5. Skohe un lokalidat adekuá pa bo empresa

Dependiendo di loke bo empresa tin pa ofresé, bo lokalidat lo ta un faktor di desisivo. Empresanan chikí hopi biaha mester tin kontakto personal ku e klientenan. Pa e motibu aki aksesibilidat ta un faktor ku ta hunga un ròl masha importante pa e tipo di empresanan aki. Aksesibilidat di bo empresa no solamente ta importante pa bo klientela, pero tambe pa bo personal i bo stakeholdernan.

6. Si, bo empresa MESTER wòrdu registrá

E promé paso pa ofisialisá bo empresa ta e registrashon na Kámara di Komersio. Siguientemente bo empresa lo mester wòrdu inskribí tambe na Ofisina di Impuesto i na Banko di Seguro Sosial.

Bo empresa no ta kompletamente formal i legal miéntras ku e registrashon nan aki no keda konkretisá..

7.  Bo a hasi petishon kaba pa e pèrmit(nan) nesesario?

Algun tipo di empresa na Kòrsou ta rekerí un pèrmit di establesimentu pa por hasi negoshi. E pèrmit aki mester wòrdu pidi na lokèt di pèrmit. Ministerio di Desaroyo Ekonómiko ta esun enkargá pa tuma e desishon si bo empresa ta bini na remarke pa e pèrmit(nan) ku a wòrdu pidi. Bo ke sa mas tokante e diferente pèrmitnan ekonómiko òf bo mester entrega un petishon? Tuma kontakto mesora ku lokèt di pèrmit.

8. Laga mundu sera konosí ku bo empresa

 Un di e promé prioridatnan di un empresa nobo ta pa sòru pa mundu sa kiko ta loke bo tin pa ofresé. Mas lihé hende sera konosí ku bo empresa, mas bo grupo di enfoke lo bai kresiendo i mas posibel kliente bo logra alkansá. MERKADIA-BO-EMPRESA!

9. Habri un kuenta bankario pa bo empresa

Asina ku bo empresa ta inskribí na Kámara di Komersio i na Ofisina di Impuesto bo por aserka bo banko di preferensia pa habri un kuenta bankario pa bo empresa. Ku un kuenta bankario separá pa bo empresa bo por manehá asuntunan fiskal i finansiero di bo empresa mihó. Semper ta konsehabel pa mantené un distinshon entre fondonan di bo empresa i bo fondonan personal

10. Kontabilidat mas ku klaro ta di sumo importansia

Den mundu di komersio ta importante pa semper bo tin bista riba e finansa di bo negoshi. Hopi ta balotá e aspekto aki enormemente. Sinembargo tur empresa eksitoso MESTER tin un persona ku ta mantené un bista aktual riba kada entrada i gastunan operashonal di e empresa

Último notisia

Mas notisia

Bo opinion