Bon gobernashon, pa ku un kalidat di bida haltu, un desaroyo sosial ekonómiko duradero i enseñansa ku ta motivá tur hende pa alkansá loke nan tin aden.

Gobièrnu di Kòrsou ta pidi pueblo pa prepará pa temporada di orkan


Ounke ekspertonan den mundu di tempu i orkan ta premirá un temporada trankil pa loke ta trata orkan den Karibe, ta importante tòg pa prepará bo mes. Ekspertonan ta bisa ku preparashon di kada hende individual, ta e mihó manera pa por sobreviví un kalamidat. P’esei mes gobièrnu ta informá pueblo di Kòrsou for di algun aña kaba pa medio di e kampaña ‘Bo no por plania un kalamidat, bo por prepará pe si’. Den e kampaña ta duna instrukshon di kiko hende por hasi promé, durante i despues di un kalamidat.

Pa medio di e website www.kalamidat.cw interesadonan por lesa kon nan por prepará pa e temporada di orkan i pa otro tipo di kalamidat ku por sosodé na Kòrsou. Por download tur informashon tambe for di e website menshoná, pa medio di e boton download bo guia di kalamidat, abou riba e homepage. E informashon ta bon pa lesa i warda den kas, na un kaminda apropiá, kaminda tur hende por yega na dje. E tin numbernan importante tambe den dje si en kaso tòg bo no por yuda bo mes den kaso di un kalamidat.

Temporada di orkan a kuminsá riba dia promé di yüni i ta kaba na fin di novèmber. Loke semper ta bon pa kòrda pa e temporada ei, ta e siguiente puntonan:

  • Sòru pa semper bo kas i bo kura ta den bon kondishon, sin ku opheto los òf palu ku por hasi daño na bo kas ora di mal tempu;
  • Sòru pa semper bo tin un pakete di emergensia den bo kas, ku awa, kuminda di bleki, remedi i produktonan higiéniko. Warda bo dokumentonan importante den plèstik pa nan no muha;
  • Palabrá ku kada persona ku ta biba den bo kas kon boso mes plan di emergensia ta hinká den otro; splika muchanan tambe kiko por sosodé na un manera komprendibel pa nan;
  • Keda vigilá e boletin di pronóstiko di tempu via radio, televishon òf www.gobiernu.cw;
  • Sòru pa bo tin bo telefòn selular semper kargá.

Gobièrnu su ofisinanan i departamentunan konserní lo duna informashon na ora si tin posibilidat pa un orkan pasa nos isla pero semper ta bon pa sigui desaroyonan di tempu bo mes tambe.

Semper por ‘like’ e página di facebook di Meteo ku ta Meteo Curacao.