Bon gobernashon, pa ku un kalidat di bida haltu, un desaroyo sosial ekonómiko duradero i enseñansa ku ta motivá tur hende pa alkansá loke nan tin aden.

Lei di Bion

Informashon pa e hóben entre 18 i 30 aña di edat


For di dia 1 di sèptèmber 2014 gobièrnu ta yuda abo komo hóben ku ta buska trabou, pa bo yuda bo mes! Na Kòrsou e kantidat di hóben sin trabou ta grandi. Na 2013, konforme sifranan di CBS, desempleo bou di hóben tabata 37, 2%. Esaki no ta bon pa abo komo hóben, pa motibu ku bo mester di un entrada pa bo kuida bo mes.
Bo esfuersonan pa buska trabou hopi biaha ta kaba den un desapunto pa motibu ku bo no tin eksperensia di trabou. Mas tantu tempu bo keda sin trabou, mas difísil ta bira pa bo haña trabou. Lei di Bion ta un oportunidat pa abo haña trabou i eksperensia di trabou.

Kiko bo tin ku hasi?

Lei di Bion ta spesífikamente pa e hóben ku no tin trabou, ku ta inskribí mas ku 12 luna sin interupshon na Sentro pa Trabou di Ministerio di Desaroyo Sosial, Labor i Bienestar.

  1. Pidi un deklarashon na Sentro pa Trabou pa bo duna e dunadó di trabou ku ta mustra interes pa bo bin traha pe.
  2. Si bo no ta inskribí ainda, bai hasi esaki awe mes. Si bo no logra haña trabou e aña aki, otro aña despues di 12 luna, bo por bini na remarke pa hasi uso di Lei di Bion. Ta bira mas interesante pa dunadó di trabou di tumá abo den servisio.
  3. Bo mester tin un sédula, pasport Hulandes òf reibeweis bálido ora bo bin inskribí.

Kiko abo mester tene kuenta kuné?

  • Lei di Bion no ta evitá ku dunadó di trabou por kitá abo for di trabou, si bo no presta òf komportá na un manera no adekuá.
  • Bo mester ta habrí pa risibí guia aktivo di un konsehero òf “Jobcoach” di Sentro di Trabou.
  • Bo mes tin ku buska e deklarashon na Sentro pa Trabou pa duna dunadó di trabou.
  • Ta solamente un biaha bo por hasi uso di Lei di Bion pa haña trabou i òf eksperensia di trabou.
  • Durante di e temporada ku bo ta traha bou di e kombenionan di Lei di Bion, bo tin ku keda traha serka e mes un dunadó di trabou.

Kiko ta pasa si kibra kontrakt?

Normalmente tur hende ku kuminsá ku un trabou nobo, tin un periodo di prueba ku ta dura dos luna. Tin biaha e relashon di trabou ta kaba promé ku e temporada di 2 luna.



Esaki por ta pa bo falta, pero e por ta pa falta di e dunadó di trabou tambe.
  1. Si bo ta traha bou di kombenio di Lei di Bion i si no ta bo falta ku bo a pèrdè trabou, bo por bai Sentro pa Trabou ku e prueba i bo por drenta un siguiente trayekto di Lei di Bion.
  2. Si ta bo mes falta ku bo a pèrdè trabou, bo ta kai for di e trayekto. Ta bira mas difísil pa bo haña trabou i òf eksperensia di trabou.

E benefisio mas grandi pa abo komo hóben ku no tin trabou!

Bo ta haña eksperensia di trabou ku por yuda abo kapasitá bo mes. Ku esei bo ta aportá na desaroyo di nos pais i mehorá nos ekonomia. Asina bo ta yuda bo sosiedat i bo mes tambe!



Pa mas informashon tokante Lei di Bion, tuma kontakto ku
Ministerio di Desaroyo Sosial, Labor i Bienestar
Sektor di Labor
T: 434-0300 / 434-0360
M: sentropatrabou@gobiernu.cw


Lei di Bion

E informashon aki ta pa stimulá dunadó di trabou pa tuma mas hóben entre 18 i 30 aña di edat na trabou

For di dia 1 di sèptèmber 2014 gobièrnu ta yuda dunadónan di trabou pa yuda un hóben haña un entrada i haña mas eksperensia di trabou! Gobièrnu a bin ku Lei di Bion, pa stimulá mas empleo pa e hóben entre 18 i 30 aña di edat. Pa abo komo dunadó di trabou tin diferente insentivo mará na Lei di Bion. E dokumento akí ta duna mas informashon tokante esaki.


E reto

Si bo tuma un hóben (entre 18 i 30 aña) den servisio den un funshon nobo (sin kita un otro trahadó):

  • ku no tabatin trabou durante di 12 luna konsekutivo.
  • ku ta inskribí na Sentro di Trabou di Ministerio di Desaroyo Sosial, Labor i Bienestar (SOAW).
  • i ku tin un deklarashon di SOAW ku ta bisa esaki,

Abo komo dunadó di trabou tin derechi riba diferente insentivo atraktivo durante un máksimo di kuater aña!

E insentivonan

  • Bo ta retené pero no ta paga impuesto riba salario pa e hóben pa un máksimo di 4 aña òf durante di e temporada ku e hóben ta den servisio*
  • Bo no ta paga e parti di dunadó di trabou di 9.5% na prima di AOV, AWW ni prima di ZV & OV durante di e temporada ku e hóben ta den servisio serka bo, pa un máksimo di 4 aña **
  • E insentivonan ta kuminsá konta for di e fecha ku e dunadó di trabou ta firma un kombenio di trabou ku e hóben.

* Si kita e hóben sin ku e hóben tin falta, e insentivonan ta stòp i por keda kobrá ku forsa retro-aktivo. Si kita e hóben pa motibu ku e no a kumpli debidamente i si tin prueba pa esaki, e insentivonan ta kaba na e momento ku para e kombenio di trabou. Esaki semper ku konosementu di Sentro di Trabou.
** AVBZ i BVZ no ta den Lei di Bion. Esei ta nifiká ku mester paga e primanan di AVBZ i BVZ di e trahadó empleá bou di Lei di Bion.

E kondishonnan

  1. E dunadó di trabou ku ke bini na remarke pa e insentivonan mester tuma un hóben ku tin den su poder un deklarashon di Sentro di Trabou;
  2. E dunadó di trabou mester registrá (mèldu) na SVB i na Inspekshon di Impuesto ku ela tuma e hóben den servisio i ku e ke hasi uso di e Lei di Bion;
  3. E dunadó di trabou mester registrá e impuesto riba salario i su gastunan di AOV i AWW normal den su atministrashon. Solamente e no ta paga nan;
  4. E dunadó di trabou mester kita i paga e parti di e trahadó di 6.5% di AOV i AWW normal na SVB;
  5. E dunadó di trabou mester paga primanan di AVBZ i BVZ normal na SVB. Esaki no ta kai bou di Lei di Bion;
  6. E dunadó di trabou mester sera un kombenio di trabou pa un mínimo di 6 luna ku e trahadó hóben;
  7. Dependé di tamaño di e empresa, e dunadó di trabou por tuma te ku un máksimo di 6 hóben na trabou den kuadro di Lei di Bion;

E satisfakshon mas grandi!

E satisfakshon di mas grandi pa abo komo dunadó di trabou ta ku bo ta yuda un òf mas hóben haña trabou i eksperensia di trabou. Ku esei bo ta yuda kapasitá mas hende, mehorá nos ekonomia i yuda konstruí nos pais.



Pa mas informashon tokante Lei di Bion, tuma kontakto ku:
Ministerio di Desaroyo Sosial, Labor i Bienestar
Sektor di Labor
T: 434-0300 / 434-0360
M: sentropatrabou@gobiernu.cw