Bon gobernashon, pa ku un kalidat di bida haltu, un desaroyo sosial ekonómiko duradero i enseñansa ku ta motivá tur hende pa alkansá loke nan tin aden.

Registrashon pa yuda St. Maarten


Dia 6 di sèptèmber último orkan Irma a pasa riba Islanan Ariba, ku a laga speshalmente e isla di St. Maarten den un estado di krísis i destrukshon hopi grave. Militarnan Hulandes a sali pa asesorá Islanan Ariba; Krus Kòrá tambe ta presente na St. Maarten pa duna promé asistensia.

Gobièrnu tin un tim di profeshonal ku ta enkargá ku tareanan den kuadro di eventual kalamidat. Konsiderando e impakto ku e sistema a kousa na Islanan Ariba e organisashon pa kombatí kalamidat (RBo) a bini huntu pa ta informá tokante e daño ku orkan Irma a laga atras i pa inventarisá e preparashonnan pa duna posibel asistensia na St. Maarten.
RBo a konstatá ku ta importante pa duna asistensia for di Kòrsou pa Islanan Ariba, pa mitiga efektonan pa e habitantenan di St. Maarten i pa yuda entre otro ku orden publiko, pone infrastruktura bèk den un kondishon akseptabel mas pronto posibel i otro trabounan ku por ta nesesario.

Pa motibu di e impakto ku e orkan a okashona na Isla Ariba, hopi instansha lo tin gana di aportá, lokual gobièrnu di Kòrsou ta apresiá. Pa e trabou i ayudonan ofresé na
St. Maarten por ser kordiná di forma mas efektivo i efisiente posibel ta importante pa tin un kanal di kordinashon.
Tur organisashon ku na un of otro manera ke aporta por tuma kontakto via email: infodrrcuracao@gmail.com.
Rbo ta fasilitá e kontakto pa ku e registrashon.
Di antemano nos ta gradisí pueblo di Kòrsou pa e sosten.