Bon gobernashon, pa ku un kalidat di bida haltu, un desaroyo sosial ekonómiko duradero i enseñansa ku ta motivá tur hende pa alkansá loke nan tin aden.

Kiko pa hasi si ahinda bo no a haña skol pa bo yu?


Minister di Enseñansa, Siensia, Kultura i Deporte sra. Marilyn Alcalá-Wallé ta hasi un yamada urgente na mayor i alumno ku te ahinda no ta inskribí na un skol.

Tur mucha entre 4 pa 18 aña tin e Obligashon di Siña i Bai Skol komo tal ta importante pa esnan ku no a haña skol ahinda pa nan yunan pa nan tuma kontakto ku e Unidat di Mantenshon di Lei di Enseñansa Obligatorio na UOW pa asina mas pronto posibel nan haña asistensha i garantisá ku nan yu ta keda inskribí na un skol.

Den e kuadro dje trabounan aki Minister Alacalá-Wallé a duna instrukshon pa yama e komishon "Commissie Schoolzoekenden" e siman aki serka otro pa nan yuda den e trabounan pa aloká esnan sin skol mas pronto posibel i raportá na minister e motibunan pakiko un of mas alumno no a o ta hañando skol riba nos isla. E komishon aki lo ta enkargá su mes na buska skol pa e muchanan ku keda registrá komo alumnonan ku no ta hañando skol.

Mayor/tutor/representante legal di e muchanan aki di 4 pa 18 aña por tuma kontakto INMEDIATAMENTE, ku Unidat Mantenshon Lei Obligatorio di Enseñansa, Unidat Leerplicht na UOW na telefon 7324-323 o 7325-279. E Unidat aki na UOW ta habri di 08.00 - 12.00 i di 13.30 - 16.30 di djaluna pa djabièrne.

Tur mucha den edat di 4 - 18 aña mester ta na skol ora tin skol.
Nan no por afòrt di pèrdè lès NIUN DIA MAS!