Bon gobernashon, pa ku un kalidat di bida haltu, un desaroyo sosial ekonómiko duradero i enseñansa ku ta motivá tur hende pa alkansá loke nan tin aden.

PRESENTASHON DI RAPÒRT DI TIGER TEAM DI EKSPORTASHON I INOVASHON


Riba djaluna 13 di mart último señor Brayn Irausquin responsabel pa e Tiger Team “Eksportashon i Inovashon” di e Plan Nashonal di Desaroyo di Pais Kòrsou a entrega Minister demisionario di Ekonomia señor Eugene Rhuggenaath e rapòrt ku e titulá: “Initiatives to remove obstacles and boost Curacao’s economic growth through innovation and exports”.

Esaki pa ku e echo ku konforme e rapòrt di OECD inovashon ta e yabi pa kresementu ekonómiko. Den un mundu dinámiko i globalisá e úniko bentaha kompetitivo ta, na momentu ku e ekonomia lokal tin e forsa pa inová mas lihé ku su kompetidornan. Esaki no ta konta solamente pa kompanianan lokal pero tambe pa gobièrnu i komunidat en general.
Ademas, ta importante pa paisnan ta den e posishon pa riba un base kontinuo keda desaroyá ekonómikamente. Den e kaso di Kòrsou esaki ta nifiká ku mester baha e dependensia di e sektornan tradishonal i kaminda mester enfoká riba krea industrianan balansá, dinámiko i duradero pa e próksimo generashonnan.

E rapòrt ta duna puntonan di salida ku akshonnan konkreto pa hasi posibel ku empresarionan por inová. E akshonnan presentá lo bai yuda pa empresarionan eksistente i esunnan di futuro por sigui inová, miéntras esaki tambe lo hasi posibel ku gobièrnu i sektor priva por buta atenshon na krea e kuadronan i insentivonan nesesario.