Bon gobernashon, pa ku un kalidat di bida haltu, un desaroyo sosial ekonómiko duradero i enseñansa ku ta motivá tur hende pa alkansá loke nan tin aden.

Gobièrnu ta mará na Lei, pero ta hasi lokual humanamente ta posibel


Mas ku 200 persona di orígen Dominikano tabata presente djaweps 24 di ougùstùs, 7 ‘or di anochi na e sentro di bario den kurá di misa di Steenrijk. Nan a haña informashon di Servisio pa Asuntunan Públiko i Servisio di Atmishon tokante nashonalidat i pasport. Tabatin oportunidat amplio pa e públiko deshogá nan mes i hasi pregunta. Minister Armin Konket, minister Quincy Girigorie i Kònsùl General di Repúblika Dominikana señor Francisco Francisco tambe tabata presente i a hiba palabra pa trese mas klaridat den problema pa renobá pasport.

E minister responsabel pa Kranshi, minister Armin Konket, a habri e anochi splikando ku Kòrsou, Aruba, i Hulanda inkluso e islanan BES ta forma parti di Reino Hulandes. Defensa, relashonnan eksterior i nashonalidat Hulandes, manera ta reglá den Statut pa Reino, ta un asuntu di Reino. Na Kòrsou nos Gobernador, komo representante di Reino, ta e outoridat ku ta aseptá petishon i otorgamentu di pasport Hulandes. Gobernador, den ámbos kaso, ta aktua den konsulta ku outoridatnan asigná pa minister (di Hulanda) di Asuntunan Interior i Relashonnan den Reino. Gobernador den e kasonan aki ta kumpli estriktamente ku reglanan stipulá dor di e minister aki. Revokashon di un pasport tambe ta tuma lugá konforme reglanan ku a keda stipulá pa minister (di Hulanda) di Asuntunan Interior i di Relashonnan den Reino.
E empleadonan na Kranshi mester sigui loke e lei di Reino ta preskribí. Den kaso ku tin indikashon di posibel otorgamentu òf optenementu di nashonalidat Hulandes a base di deklarashonnan falsu, engañoso òf no kompleto, Kranshi ta obligá na investigá. Si resultá ku esaki en bèrdat ta e kaso, ta posibel ku minister di Hustisia di Hulanda den su kalidat di minister di Reino por disidí ku e persona en kuestion ta pèrdè e nashonalidat Hulandes. Den e tipo di situashonnan aki klientenan tin e tendensia di kulpá empleadonan di kranshi pa e desishon. Kaminda e empleadonan di ‘Kranshi’ ke i ta hasi nan trabou humanamente mas mihó posibel den kuadro di lei. Un di e empleadonan di Kranshi ku tabata presente ta Sra. Pauletta. Sra. Pauletta a duna informashon i a kontestá mayoria pregunta di e públiko presente di un forma ekselente.

Di parti di Ministerio di Hustisia, Minister Quincy Girigorie a splika ku gobièrnu ta konsiente di e situashon problemátiko ku un persona bibá na Kòrsou por haña su mes aden na momentu ku e pèrdè nashonalidat Hulandes. No ta rasonabel pa Gobièrnu krusa man i laga e hendenan desampará. P’esei den kuadro di e outoridat ku Gobièrnu tin pa disidí ken por drenta i keda na Kòrsou, Gobièrnu di Kòrsou ta brinda e personanan aki e opshon pa haña un permisio di estadia permanente. Di parti di Servisio di Atmishon Sra. Nicolaas tabata presente i a yuda kontesta preguntanan di públiko.

Kònsùl General di Repúblika Dominikana señor Francisco Francisco a partisipá ampliamente na e seshon. Entre otro e la a yuda aklará i a splika ku lokual nos ta bibando aworakí ta un herensia di loke a pasa den pasado. Mamanan ku bon intenshon pa yuda nan yunan a kometé echonan ku awor ta sali na kla i por perhudiká nan yunan. Huntu nos ta buska formanan pa trata e kasonan problemátiko di un forma humano.

E interes i kantidat di preguntanan tabata hopi i a hasi anotashon di kasonan individual pa despues siguí duna guia na e personanan aki. E intenshon di e tipo di anochi di informashonnan aki ta pa duna mihó servisio na públiko.