Bon gobernashon, pa ku un kalidat di bida haltu, un desaroyo sosial ekonómiko duradero i enseñansa ku ta motivá tur hende pa alkansá loke nan tin aden.

Paga tinu na trabounan di mantenshon na dos viaduktonan


Obra Públiko ta atvertí ku for di dia 5 di aprel próksimo, tin dos viadukto ku por ta será kompleto òf parsialmente pa tráfiko pa motibu di trabounan di mantenshon grandi. Ta trata di e viadukto bou di Presidènt Betancourt Blvd na Skalo (esun for di brùg Juliana direkshon di Waaigat) i di e viadukto bou di A.A. de Lannoy- Willems Blvd na Otrobanda (for di brùg Juliana direkshon Arubastraat). E trabounan ta nesesario pa motibu ku nunka e viaduktonan no a risibí mantenshon ekstenso, for di dia ku a traha nan den añanan 70. Durante di e periodo entre 5 i 17 di aprel ta traha riba e viadukto menshoná na Skalo. Esun na Otrobanda ta den mantenshon entre 5 i 24 di aprel próksimo. E oranan di trabou i eventual opstrukshon ta entre mitar di 9 di mainta i 5or di atardi.

Ku bòrchinan ta duna instrukshon kon pa kore e ruta di desviashon. Esnan ku normalmente ta baha for di brùg Juliana, pa pasa bou di e viadukto direkshon di Waaigat, mester sigui kore direkshon di Parera, bai man drechi na e lusnan di tráfiko pa bai Berg Altena i sigui via di Arraratweg pa bai Skalo i Punda. Tur kompania, restorant i snèk na Skalo i besindario ta keda aksesibel pa públiko durante di e trabounan di mantenshon. E tráfiko ku mester a pasa bou di e viadukto for di brùg Juliana, direkshon Arubastraat na Otrobanda, mester sigui kore bai direkshon di Seru Dòmi pa hasi un ˈU-turn na e lusnan di tráfiko, pa asina sigui e kaminda. Ta trata di stroba tráfiko ménos ku ta posibel na ámbos proyekto. E kompania ku ta traha riba e proyektonan ta Aannemersbedrijf Betonbouw B.V.