Bon gobernashon, pa ku un kalidat di bida haltu, un desaroyo sosial ekonómiko duradero i enseñansa ku ta motivá tur hende pa alkansá loke nan tin aden.


Origen
Dia ku Reina Wilhelmina a keda koroná komo Reina na 1898, Frater Radulphus
a skirbí un kantika ku a bira konosí komo “Den tur Nashon Nos Patria ta poko
konosí”. Durante e selebrashon di koronashon di Reina Wilhelmina, alumnonan
di St. Jozefschool na Pietermaai a kanta e kantika aki riba melodia di e kantika
alemán “Tiroler Hoferlied”. Despues Frater Candidus Nouwens a kompositá e
melodia ku ta kanta te ku awor.
Aña aden aña afó a kanta e kantika aki riba Dia di La Reina den Fòrti i tambe
na otro okashonnan ofishal. Asina a kuminsá konsiderá “Den Tur Nashon” òf
“Nos tera” komo Himno di Kòrsou.
Riba dia 26 di yüli 1978 a rekonosé e kantika aki ofishalmente komo HIMNO DI
KÒRSOU, momentu ku Konseho Insular di Kòrsou a aprobá e teksto aktual riba
proposishon di Komishon di Himno.
Dia 18 di yüni 2003 Konseho Insular ademas a stipulá tur e reglanan pa uso i
komportashon pa Him no di Kòrsou den un ordenansa insular (A.B. 2003 no.
53).
Ki ora ta toka òf kanta e himno kompletu?
Na e siguiente okashonnan a stipulá ku ta toka òf kanta e himno kompletu, o
sea tur ocho kuplèt:
Momentu ku tantu Gezaghebber, diputadonan òf miembronan di
Konseho Insular keda instalá den nan funshon nobo;
Na reunionnan organisá pa Teritorio Insular di Kòrsou pa selebrá un dia
di fiesta ofishal òf na konmemorashon ofishal di un evento;
Na eventonan ofishal organisá pa Teritorio Insular kaminda ta hisa
Bandera di Kòrsou.
Ki ora ta toka òf kanta e promé i di kuater kuplèt so?
• Na kuminsamentu i na final di reunion di Konseho Insular;
• Na apertura di monumento òf símbolonan konmemorativo ku Teritorio
Insular organisá;
• Na enkuentronan solèm di instansha gubernamental, instituto òf
organisashonnan no-gubernamental situá na Kòrsou;
• Na bishita ofishal na Kòrsou di miembronan di Kas Real i funshonarionan
haltu di otro pais, manera e presidente òf promé minister di un pais, bou
di e kondis hon ku esaki ta konkordá ku protokòl diplomátiko;
• Na bishita ofishal di funshonarionan di Teritorio Insular di Kòrsou na otro
paisnan, bou di e kondishon ku esaki ta konkordá ku e programa stipulá
pa e Ministerio konserní di e pais en kuestion;
• Na apertura i klousura di enkuentronan deportivo internashonal;
• Na radio i televishon mei anochi (12’ or di anochi) Aña Nobo i tur dia na
inisio i final di transmishon di dia.
Kon ta toka òf kanta e himno?
Momentu ku toka e Himno di Kòrsou mester hasi esaki segun e partitura,
stipulá den artíkulo 2, promé frase, di e Ordenansa di Himno di Kòrsou (A.B.
1978, no. 41).
Por kanta e himno únikamente na Papiamentu.
Kon mester aktuá momentu ku ta toka òf kanta himno?
Momentu ku ta toka òf kanta himno mester tene kuenta ku lo siguiente:
Tur presente ta skucha e himno ku un aktitut respetuoso, kaminda hende
hòmber mester kita pèchi, ku eksepshon si ta e ta uniformá;
Presentenan mester tin nan kara dirigí den direkshon di e bandera den
kaso ku ta toka òf kanta e himno momentu ku ta hisa bandera;
Den kaso ku ta toka mas ku un himno na inisio di un evento na Kòrsou,
ta toka òf kanta e Himno di Kòrsou promé siguí pa e otro himnonan;
Den kaso ku ta toka e himnonan na final di un evento asina, ta toka nan
den sekuensha kontrali di e sekuensha ku a usa na inisio di e evento.