Bon gobernashon, pa ku un kalidat di bida haltu, un desaroyo sosial ekonómiko duradero i enseñansa ku ta motivá tur hende pa alkansá loke nan tin aden.

Tokante Kòrsou

content image


Kòrsou (òf Curaçao) ta un isla den parti zùit di Karibe serka di e kosta di Suramérika. E isla, ku su kapital ta Willemstad, ta un di e kuater paisnan ku ta forma Reino Hulandes. Te ku 2010 Kòrsou tabata forma parti di Antia Hulandes (huntu ku Boneiru, Sint Maarten, Saba i Sint Eustatius). Riba 10 di òktober 2010 Kòrsou a haña su status aparte.

Debí na su desaroyo históriko, e isla awor ta habitá pa desendientenan di diferente grupo étniko. Kòrsou por ta un bon ehèmpel di e forma ku hendenan di vários orígen por konbibí ku otro i forma un nashon multikultural. Gran parti di e populashon ta afrokaribense. Esaki ta inkluí hende multirasial ku ta identifiká su mes komo afro-karibeño. Tambe tin un minoria di entre otro hende di orígen hulandes oropeo, dominikano, kolombiano, haitiano, chines, venesolano, sürnam, portugues, arubano i mas.

Papiamentu, hulandes, spañó i ingles ta e idiomanan ku mas bo ta skucha na Kòrsou. Mayoría habitante tin komo idioma nativo papiamentu miéntras hulandes ta e idioma ofisial ku for di tempu kolonial tabata e idioma di instrukshon. Ingles i spañó ta e idiomanan ku basta minoridat ta dominá i tin komo idioma nativo.

Kòrsou tin un área di 444 km2 ku ta igual na 171 mia² i su punto mas haltu Seru di Sint Kristòfel (375 meter). E último sifranan (2011) di Ofisina di Statistik ta indiká ku tin 150.563 habitante riba e isla. Klein Curaçao, Kòrsou chikí, ta situá bintisinku kilometer sùitost di Kòrsou. E isla no ta habitá pero ta funshoná mas bien komo atrakshon turístiko i pa piskadónan deskansá.

Kòrsou ta konosí den mundu turístiko pa su refnan di koral kolorido ku ta hasi'é un di e destinashonnan faborito pa sambuyá. Parti zùit di e isla tin hopi lugá ku ta popular bou di sambuyadónan. Pa esnan ku ke disfrutá di e bunitesa di Kòrsou riba tera, e vegetashon ta konsistí di vários mata ku ta keda bèrde henter aña apesar ku áwaseru no ta kai mashá.

Kòrsou su klima ta seku semi-árdio i pa aña ta kai alrededor di 553 milimeter di áwaseru. Temporada di áwaseru ta ofisialmente entre òktober ku yanüari. Temperatura ta relativamente konstante, ku algun diferensha durante aña. Bientu di pasat ta trese freskura den dia i e mesun bientu di pasat ta trese kalor anochi. Tin un promedio di 31,2 grado selsio den dia pa aña, anochi ta un promedio di 25,6 grado selsio.

Pa mas informashon statístiko di Kòrsou bishitá website di Ofisina di Statistik di Kòrsou:
www.cbs.cw