Notisia

Presentashonnan inspirativo durante éksitoso mini konferensha “No tin salú sin salú mental”

Geplaatst op 9 Mei 2019 dor di Ministerio di Salubridat Públiko, Medio Ambiente i Naturalesa

WILLEMSTAD – Djamars último a tuma lugá e presentashon di e vishon nobo pa salú mental kombiná ku un mini konferensha. E aktividat a tuma lugá den ouditorio di Banko Sentral ku tabata yen ku personanan ku ta laborá den e sektor i interesadonan. Minister Camelia- Römer a hasi apertura ofisial ku un presentashon amplio di su vishon pa e sektor den su totalidat. Presentashonnan ku tambe a hala atenshon tabata di direktor di maneho di ministerio señora Jeanine Constansia- Kook, sikiatra Marijke van Putten ku a bini for di Hulanda i di Marcelino Mauricio di Mental Health Caribbean Bonaire. Organisashon Pan Amerikano di Salú (PAHO) a trese su mensahe pa salú mental di Kòrsou mediante un vidio. Na final klientenan di Fundashon Sonrisa di forma ameno a duna nan propio testimonio di e kuido ku nan ta risibí i nan plannan pa futuro.

Minister Camelia- Römer durante su presentashon di apertura a mustra primeramente ku Ministerio di GMN ta un di esnan mas bunita pa laborá aden, pa motibu ku e hende ta sentral den tur tarea di e ministerio. Minister a informá tambe ku gobièrnu ke un kuido sentral sin fragmentashon pero ku e 700 mion Florin ku ta invertí den salú ta dirigí riba e hecho ku e hende ta malu kaba. Defakto mester dirigí e atenshon na e hende momentu ku e ta salú, hasiendo uzo di insentivonan di prevenshon. Minister a pone hopi énfasis riba e echo ku mester saka salú mental for di esfera di taboe (algu ku niun hende no ke papia di dje) pa asina atendé e malesa di forma diligente. Por yega un momentu den bida ku nos mes mester di kuido mental dor ku diferente faktor por kondusí na esaki. Minister a finalisá mustrando e importansha pa riba tereno di salú mental tambe nos traha huntu den reino. Sra. Jeanine Constansia- Kook a duna un presentashon amplio di e vishon nobo pa salú mental. Punto di salida ta pa den kuadro di prevenshon duna mas informashon i forma un base di koperashon ku otro ministerionan.

Sikiatra Marijke van Putten di GGZ Noord Holland Noord a splika kon organisashonnan ku ta traha ku salú mental ta funshoná den su region i importansha di digitalisashon i kuido dirigí riba rekuperashon. Sr. Marcelino Mauricio a splika kon a lanta Mental Health Caribbean Bonaire i e struktura den kua nan ta funshoná. Sentral den presentashon di Van Putten i Mauricio ta fortifikashon di kuido ambulante i importansha di eliminá stigmatisashon di klientenan. ámbos orador a mustra tambe importansha pa hasi uzo di ekspertonan di eksperensha (ervaringsdeskundigen). PAHO a suprayá tur komponente di nos plan nashonal di salú mental den su mensahe. Dr. Claudina Cayetano i dr. Taraleen Malcolm di PAHO a enfatisá e importansha di fortifiká nos sistema di salú mental i atendé esaki komo parti di salú públiko i trese e servisio mas serka e kliente.   

Riba potrèt, Minister Camelia- Römer durante su presentashon di apertura.

Riba potrèt, sra. Jeanine Constansia- Kook durante presentashon di e vishon nobo pa salú mental.

Riba potrèt, sr. Marcelino Mauricio dunando splikashon kon a lanta Mental Health Caribbean Bonaire.

 Riba potrèt, sikiatra Marijke van Putten di GGZ Noord Holland Noord durante su presentashon. 

Riba potrèt, un bista di e ouditorio di Banko Sentral durante e mini konferensha.

Ministerio konserní

Bo opinion