Notisia

Gobièrnu a bini ta supsidiá 1.2 mion florin pa aña ku dunamentu di pasport. Un Gobièrnu responsabel no por a keda sin koregí un

Geplaatst op 18 Ougùstùs 2019 dor di Ministerio di Maneho di Gobernashon, Planifikashon i Servisio Públiko

Gobièrnu a bini ta supsidiá 1.2 mion florin pa aña ku dunamentu di pasport

Un Gobièrnu responsabel no por a keda sin koregí un situashon robes

 

Willemstad  - Gustosamente Gobièrnu di Kòrsou ta duna pa medio di e komunikado aki informashon adishonal tokante e ahuste di tarifa di pasport ku Parlamento a aprobá.

  

Komponentenan di kua tarifa di pasport ta konsistí

Un di e poko asuntunan ku no ta kai bou di outonomia di Kòrsou ta asuntunan di nashonalidat i mará na esaki asuntunan di pasport. Ta Hulanda ta determiná e tarifa máksimo ku por kobra un siudadano pa por disponé di un pasport. Hulanda ta determiná tambe e montante ku kada Kòrsou mester paga na Reino pa kada pasport. E espasio ku keda (preis máksimo ménos e parti ku mester paga na Reino) ta liber pa Kòrsou fiha di moda ku ta kubri e gastunan ku e Kranshi tin na kosto pa por duna e servisio pa ku e pas­port. Hulanda, kada aña di nobo, ta adaptá e parti ku mester keda entregá na Hulanda pa kada pasport. E tarifa máksimo ku Hulanda e stipulá pa tarifa di pasport ta di 213 florin i 175 florin pa respektivamente pasport pa adulto i menornan di edat.

 

Tarifa di pasport na Kòrsou ta igual for di 1992, siendo e mester a subi tur aña.

E montante di 100 florin pa pasport ta data di 1991. Apesar di e echo ku kosto di bida na Kòrsou a subi i ku Hulanda tur aña ta adaptá loke ta toka un entidat pa paga na Hulanda pa kada pasport, Kòrsou no a adaptá tarifa di pasport na Kòrsou durante e último 28 añanan. Asina ta ku Hulanda, pa medio di ‘Besluit Paspoortgelden’ a bolbe adaptá tarifa di pasport entrante 9 mart 2014.

 

Loke mester paga Hulanda a subi ku 88% riba 9 di mart 2014

Hulanda, na 2014, a tuma e desishon ku e kantidat di aña di balides di un pasport ta keda oumentá di 5 aña pa 10 aña. Esaki pa loke ta trata adulto. Esun pa personanan te ku 17 aña a mantené balides di 5 aña. Ademas di subi e kantidat di aña di balides di un pasport pa adulto, a oumentá e parti ku mester paga Hulanda ku 88%. Konsekuensia di esaki ta ku e tarifa di 100 florin no tabata alkansá mas kubri e gastunan. Ke mèn ku Gobièrnu a kuminsá supsidiá otorgamentu di pasport pa adulto.

  

Gobièrnu a kai atras ku kasi 9 mion florin na entrada for di otorgamentu di pasport

Tabata e intenshon pa kuminsá kobra e tarifa nobo pa pasport entrante yanüari 2015. E tarifa pa pasport pa adulto lo mester a bira 200 florin i esun pa menornan di edat 150 florin. Sinembar­go, a resultá ku e koalishon di e tempu ei a skohe pa no subi e tarifanan. Esaki ku e konsekuen­sia ku Gobièrnu, durante e periodo di 2015 te ku yüni 2019, a kobra un montante di kasi 9 mion florin ménos ku loke lo mester a kobra si a kambia e lei na 2014. Kranshi, durante e periodo aki, a otorgá 75.434 pasport na adultonan i 18.859 na menornan di edat. E loke a kobra di ménos na pasaporte pa adulto ta un montante di 7.5 mion florin i pa loke ta trata pasaporte pa mucha/adulto esaki ta 0.9 mion florin.

 

Minister Konket a pidi SOAB pa investigá si un subida di tarifa na 2014 tabata hustifiká

Minister Konket, mirando ku gobièrnunan anterior, no tabata ke subi tarifa di pasport a pidi SOAB pa hasi un investigashon pa komprobá si e oumento ku a keda proponé na 2014 tabata hustifiká. SOAB a hasi e investigashon i a konkluí ku e gastunan total ku Gobièrnu tin ku duna­mentu di pasport pa menornan di edat ta keda kubrí ku e montante di 100 florin, miéntras ku gastunan total pa ku dunamentu di pasport pa adulto si ta leu riba 100 florin. A base di e rapòrt di SOAB i análisis di ministerio di Finansa a konkluí ku lo por mantené e tarifa di pasport pa menornan di edat na 100 florin i subi esun di adulto na 200 florin.

 

Gabinete Rhuggenaath a asumí responsabilidat pa koregí un situashon robes

Pasport ta un dokumento ku ta e persona en kuestion so tin benefisio di dje. P’esei no ta ko­rek­to pa laga esun ku no tin probecho di e pasport paga esun ku si tin probecho. Na momentu ku esun ku ta saka un pasport ta paga un tarifa ku ta ménos ku e gastunan enbolbí ku produk­shon di e pasport, anto ta usando plaka di impuesto pa supsidiá sakamentu di pasport. Gobièrnu, manera resultado di e investigashon di SOAB ta konkluí, a bini ta supsidiá sakamentu pasport ku un montante di algu mas ku 100 mil florin pa luna e último 65 lunanan. Ta trata aki di un mon­tante di 1.2 mion florin pa aña. Plaka ku por a keda hinká den por ehèmpel enseñansa i de­por­te. P’esei Gabinete Rhuggenaath no por a laga e situashon aki persistí.

Ministerio konserní

Bo opinion