Notisia

Reunion ku habitantenan di Choloma i Seru Grandi

Geplaatst op 27 Òktober 2018 dor di Ministerio di Salubridat Públiko, Medio Ambiente i Naturalesa

Durante un reunion riba djasabra 27 òktober 2018 a papia ku algun habitante di e barionan Choloma i Seru Grandi tokante di problemanan ku ta sosodé hopi den e barionan. E diskushon tabata kontinuashon di un seri di reunionnan den pasado den kuadro di un aserkamentu dirigí riba bario, ku Kuerpo Polisial Kòrsou (KPC) a introdusí. E X-team, ku ta e tim pa kombatí ilegalidat den medio ambiente, tabata presente den e reunion aki pa duna informashon i kontestá preguntanan di e habitantenan.

Na warda di polis na Montaña a bini huntu ‘Buurtregisseur’ Rayon Montaña di KPC sr. Aniceta, di parti di e X-team, Inspektor di Medio Ambiente i Naturalesa sr. De Lannoy, Inspektor EOP/EROC di ‘Uitvoeringsorganisatie Ruimtelijke Ordening en Planning’ sr. Barlowe i algun habitante di Choloma i Seru Grandi. Despues di un kombersashon tokante di e asuntunan di interes di e habitantenan, e personanan presente a sali pa e lèntfil ilegal na Choloma.

Despues a diskutí tokante di opshonnan pa kontrarestá e aktividatnan ilegal, na kas di un di e habitantenan ku ta miembro di ‘neighbourhood watch’ instalá resientemente. Polis ta ranka e proyekto pa yega di mihó kontrol sosial. Durante e reunion polis a enkurashá e habitantenan pa partisipá mas aktivo den supervishon den nan mes bario i pa mèldu aktividat ilegal. A indiká tambe ku e habitantenan lo organisá un fundraising pa asina por pone bòrchi di atvertensia na e lugánan unda ta tira sushi ilegal. Finalmente, a traha un grupo di Whatsapp di moda ku habitantenan por informá otro.   

Ministerio konserní

Bo opinion