Notisia

20 Aña Arte di Palabra

Geplaatst op 19 Mei 2019 dor di Ministerio di Enseñansa, Siensia, Kultura & Deporte

Willemstad- den un sala yen a tuma lugá djasabra 18 di mei, Luna Yen, e kompetensia final di Arte di Palabra entre e islanan Aruba, Bonaire i Kòrsou. Arte di Palabra a drenta e selebrashon di su 20 Aniversario.

Pa di 20 aña konsekutivo e organisashon ta hasiendo Arte di Palabra, e kompetensia literario di poesia, kuenta i haiku na papiamentu pa tur skol avansá.  E idea pa e evento akí a lanta na 1999, na okashon di introdukshon di papiamentu komo materia obligatorio den enseñansa avansá. Den e evento aki por usa inisiativanan propio pero tin espasio alabes pa poemanan i kuentanan eksistente.  E aña aki Arte di Palabra ta dediká na 5 persona: 3 di Kòrsou (Renate Joe, Cesar Palacios, Arthur Tjin Kon Fat) i Bonaire (Ubaldo Anthony) i Aruba (Mirjam Roselle Koolman) pa a yuda engrandesé Papiamentu/o.

Minister Marilyn Alcalá-Wallé a hiba palabra i a felisitá e organisashon ku e inisiativa aki ku ta kuadra kompletamente den e afan di gobièrnu pa promové uso di bon papiamentu i krea oportunidat pa hóbennan. Alabes e mandatario a deseá e hurado hopi forsa mirando e talento di nos hobennan.

*****************************************

Ministerio konserní

Bo opinion