Notisia

A KUMINSA KITA OPHETONAN DI PROPAGANDA DEN AREA PÚBLIKO

Geplaatst op 31 Yüli 2018 dor di Ministerio di Tráfiko, Transporte i Planifikashon Urbano

A kuminsa kita ophetonan di propaganda den area públiko

Willemstad - Minister di Tráfiko, Transporte i Planifikashon Urbano (VVRP) ta anunsiá tur doño di bòrchinan di propaganda ku konforme e lei di Òrdu Públiko (Landsverordening Openbare Orde (LOO)), ku a drenta na vigor dia 1 di ougùstùs 2015, a kuminsá kita ophetonan di propaganda komersial den área públiko.

Ministerio di VVRP a kuminsá kita tur bòrchi òf otro opheto di propaganda komersial ku doñonan no a kitá den e tempu stipulá. Lo kita e ophetonan di propaganda komersial  riba kosto di e persona ku a violá e lei di Òrdu Públiko. Kualke sea e  sirkunstansia Gobièrnu no ta responsabel pa dañonan na e bòrchi òf otro ophetonan di propaganda komersial ku kitá.

Den e término stipulá di dos siman, desde e fecha ku a pega e steker, 19 doño di ophetonan di propaganda komersial a kita nan bòrchinan.  Mester  informá tambe ku ya kaba Ministerio di VVRP a kita mas ku 100 bòrchi. Esakinan ta ophetonan ku ta pegá un kaminda ku no ta permití, manera na un bòrchi di tráfiko, na lus di tráfiko òf riba middenberm i tur ophetonan di propaganda ku a risibí un steker i ku no ta hinká den betòn. Seguidamente a kuminsá kita tambe ophetonan di propaganda komersial ku ta hinká den betòn.

Pa mas informashon tokante esaki por tuma kontakto ku Servisio pa Planifikashon Urbano, (ROP) via di number di telefòn 433-3209 òf na e-mail info.rop@gobiernu.cw . Pa mas informashon tokante e eksigensianan pa bòrchi òf otro ophetonan di propaganda komersial, por tuma nota di e Maneho pa Ophetonan di Propaganda (Beleid voor Reclame-uitingen) riba e wèpsait di VVRP (www.vvrp.cw).

 

 

Ministerio konserní

Bo opinion