Notisia

ABC a pèrdè kaso kontra di Minister di ESKD

Geplaatst op 26 Òktober 2018 dor di Ministerio di Enseñansa, Siensia, Kultura & Deporte

Riba 16 òktober 2018, korte den promé instansia a duna veredikto den e kaso ku "ABC Opleiding en Training", representá dor di sr. Javier Silvania a inisiá kontra di Minister di Enseñansa, Siensia, Kultura & Deporte sra. Marilyn Alcala -Walle.

E kaso su enfoke tabata basa riba e petishon ku a keda rechasá, pa rekonosé e kursonan riba nivel di HBO i SBO ku "ABC Opleiding en Training" ta ofresé. Durante e prosedura sr. Silvania a trata pa medio di avisonan grandi den diferente korantnan lokal i tambe entrevistanan na diferente radio i televishon, pa desakreditá Minister, su ámtenarnan, i su abogado dor di akusá nan di korupshon, inkompetensia i inkapasidat, tur esaki ku meta pa influensia e proseso pa tuma desishon riba su petishon. Minister i su ámtenarnan a konsiderá e aktonan aki komo un forma di chantahe i no a hasi kaso ni duna oido na e aktonan aki. Pa medio di un huisio sumario Minister a pèrkurá, pa sr. Silvania rektifiká su deklarashonnan duna na prensa.

For di e veredikto di 16 òktober 2018 por konkluí ku e petishon pa rektifiká tabata na su lugá. Hues a deskribí e método ku e Ministerio a uza pa trata ku e petishon di "ABC Opleiding en Training" i a duna e Ministerio rason riba tur punto ku a uza pa nenga e petishon. Solamente estudionan di HBO ku tin un durashon di 4 (Bachelor) i 2 (Associate Degree) aña, kaminda un di e rekisitonan ta ku studiantenan mester dispone di un HAVO òf VWO diploma i ku ta keda duna dor di dosentenan ku ta kumpli ku e rekisitonan ku lei ta preskribí por bin na remarke pa rekonosementu.

Durante evaluashon di e kurso/estudionan HBO ku "ABC Opleiding en Training" ta ofresé, a sali na kla ku nan no ta kumpli ku e eksigensianan di durashon, rekisitonan di atmishon i ku niun di e dosentenan ta outorisá. Esaki ta konta tambe pa e estudionan di SBO ku ABC Opleiding en Training ta ofresé. Durante evaluashon di e kurso/estudionan SBO ku "ABC Opleiding en Training" ta ofresé, a sali na kla ku nan no ta kumpli ku e eksigensianan di durashon, rekisitonan di atmishon i ku ta solamente 1 di e dosentenan ta outorisá,  Komo tal rekonosementu di e estudionan i kursonan aki no por segun lei.

Athunto veredikto di Korte den promé instansia. Klik aki pa e Veredikto

Ministerio konserní

Bo opinion