Notisia

ÁMTENAR DEN PROBLEMA PA MOTIBU DI DEBE TA VULNERABEL PA KORUPSHON.

Geplaatst op 30 Novèmber 2018 dor di Ministerio di Maneho di Gobernashon, Planifikashon i Servisio Públiko

Ámtenar den problema pa motibu di debe ta vulnerabel pa korupshon Gobièrnu ta dal e promé pasonan pa atendé ku e problema

 

Willemstad- Pueblo di Kòrsou meresé un kuerpo di ámtenar ku ta íntegro i ta tarea di Gobièrnu pa hasi tur loke ta nesesario pa logra esei. Investigashonnan na otro paisnan na mundu a revelá ku ámtenarnan ku ta den problema pa motibu di debe ta forma un riesgo pa integridat di Gobièrnu ya ku nan ta vulnerabel pa chantahe. Ademas, na momentu ku un amtenar ta den problema pa motibu di debe, e no por funshoná na drechi tampoko. A sali na kla tambe ku, un ámtenar na momentu ku e ta vulnerabel pa chantahe, ta tambe un potensial ‘target’ di kriminalnan. E investigashon na otro paisnan ta mustra tambe ku e problema aki ta konsekuensia di e tendensia den komunidat den sentido ku siudadanonan kada bes tin mas difikultat pa mantené ekilibrio entre loke nan ta risibí na entrada i loke nan ta gasta.

 

Konsiderando ku no tin motibu pa pensa ku e situashon na Kòrsou lo ta diferente, Ministerio di Gobernashon, Planifikashon i Servisio, den koperashon estrecho ku Banko Sentral, ta organisá seshonnan di konsientisashon pa ámtenarnan di Kòrsou. E seshonnan aki ta un promé paso den e maneho di Gobièrnu pa atendé ku e problema aki i ta forma parti di e proyekto Duradero. Meta di e proyekto ta pa halsa e produktividat, motivashon i vitalidat di e ámtenar. Tambe pa hasi e ámtenar resistente na korupshon. E seshonnan aki ta tambe riba petishon di e propio ámtenarnan. Un investigashon ku a hasi bou di hefenan di servisio i ámtenarnan enkargá ku maneho di rekurso humano, a trese na kla ku diferente empleado públiko ta interesá pa siña manehá nan entrada mihó.

 

Banda di e konferensia tin posibilidat tambe pa e ámtenar ku ta deseá sigui un training kon pa traha i manehá su presupuesto personal. Tambe tin posibilidat pa haña yudansa pa den kooperashon ku bankonan lokal yega na solushon na momentu ku e problema di debe di e ámtenar ta grave.

 

E seshonnan ta un inisiativa di HRO, e departamentu di maneho di rekurso humano di Gobiernu, i ta tuma lugá bou di ouspisio di minister Armin Konket i ku kooperashon di Banko Sentral di Kòrsou i St. Maarten. Entre tantu a tene seshon pa ministerionan di Gobernashon, Planifikashon i Servisio, ministerio di Finansa, ministerio di Ekonomia i ministerio di Hustisia. Próksimamente lo tene seshonnan pa demas ministerionan.

 Verhelpen van SchuldenproblematiekVerhelpen van SchuldenproblematiekVerhelpen van Schuldenproblematiek

 

 

 

------------------------------------- NO PA PUBLIKASHON --------------------------------------------------

 Pa mas informashon por tuma kontakto ku Kesha Camelia riba number di telefòn 529-1010 òf via mail na kesha.camelia@gobiernu.cw

Ministerio konserní

Bo opinion