WILLEMSTAD – Awe 22 di ougùstùs alrededor di 3’or di mardugá vigilantenan presente na edifisio di Ontvanger a skucha di repente un eksploshon ku seguidamente a resultá den un kandela bastante fuerte na parti sùit di e edifisio. Den korto tempu unidat polisial i kuerpo di bombero tabata presente na e sitio pa atendé e kandela. Esaki a pone ku finalmente a logra dominá e situashon i evitá ku e kandela a sigui plama pa otro partinan di e edifisio.

Despues ku outoridatnan di Gobièrnu i representantenan di Ontvanger a yega na e sitio, a konstatá rápidamente ku ta trata aki di e área kaminda ta hasi kobransa, esta kaminda ta hasi tur trámite pa kobra pueblo impuesto. Sinembargo, magnitut di e daño eksakto kousá na e edifisio na a momentunan akí no ta posibel, debí ku por lo pronto no ta seif ainda pa drenta e edifisio. No opstante esaki representante di Ontvanger, sr. Alfonso Trona, ya ta konstatá ku probablemente ta trata aki di pèrdida di diferente kopia di fail i ekíponan.

Fortunadamente, ningun di e datonan akí a bai pèrdi ya ku pa algun aña kaba Ontvanger ta traha ku un sistema digital i ta sigurá di un ‘backup’ di tur dato. Esaki ta nifiká ku Ontvanger por lo pronto por sigui brinda servisio na komunidat atraves di e plataformanan digital (‘online service’ di belasting) i kobransa di impuesto por sigui tuma lugá pa medio di e diferente bankonan ku Ontvanger tin kolaborashon kuné.

Aktualmente departamentu tékniko forénsiko di polis ta investigando si kousa di e insendio ta pa motibu di un korto sirkuito òf ku ta trata aki di un kandela intenshonal. Mientrastantu ku e investigashon ta kanando lo tuma e pasonan nesesario pa por hasi e debido adaptashonnan, asina Ontvanger por habri su portanan atrobe pa risibí kliente. Ta analisando aworakí e posiblidat pa Ontvanger por kuminsá risibí kliente atrobe for di djaluna 26 di ougùstùs dor di bin ku solushonnan manera muda temporalmente pa e edifisio di Core N.V. òf un edifisio alternativo.

Gobièrnu di Kòrsou, bou di responsabilidat di Ministerio di Finansa i Hustisia, lo sigui hasi su máksimo esfuerso pa minimalisá impakto di e suseso akí  i lo sigui tene komunidat di Kòrsou na altura di tur desaroyo.