Notisia

ARTISTANAN TAMBE POR HASI USO DI UN STANDPLAATS DEN SENTRO DI SIUDAT

Geplaatst op 17 Aprel 2019 dor di Ministerio di Desaroyo Ekonómiko

WILLEMSTAD- Ministerio di Desaroyo Ekonómiko (MEO) ta e ministerio responsabel pa otorgá pèrmitnan di standplaats pa entre otro standplaatsnan ubiká den nos sentro di siudat. Últimamente tin hopi interes pa e stèntnan situá dilanti di Marshe Nobo (Marshe Rondó) i tambe esnan na altura di Awasá. Pa medio di esaki MEO kier informá un i tur mihó riba disponibilidat di standplaatsnan den Sentro di Siudat.

 

Ministerio di Desaroyo Ekonómiko sin mas ta kontentu di mira e interes ku ta biba bou di nos pueblo pa por sali padilanti. Último tempu e ministerio a risibí diferente petishon di mikro empresarionan ku ta deseá e oportunidat di por bende nan produkto via un stènt den nos sentro di siudat.

Lei di LOO (Landsverordening Openbare Orde) ta indiká ku Ministerio di Tráfiko, Transporte i Desaroyo Urbano ta esun enkargá pa indiká na unda ta permití pa tin stènt den nos sentro di siudat i MEO tin e responsabilidat final pa otorgá e pèrmit di standplaats na e personanan ku ta deseá di bende for di un di e sitionan aki. Aktualmente tur e sitionan disponibel den sentro di siudat ya ta okupá dor di un òf mas mikro empresario. Pa e motibu aki MEO no por tuma mas petishon pa standplaats pa e espasio dilanti di Marshe Rondó ni tampoko pa e puestonan na Awasá.

Sinembargo tin espasio si ainda pa artistanan lokal por okupá un puesto na un di e lokalidatnan den Punda òf Otrobanda ku ta designá pa artistanan. Esaki ta enserá un espasio di 2,5x2,5 meter (masoménos 6,5m2) ku por keda otorgá periódikamente na artistanan ku ta deseá esaki. E artista por ta sea un (òf mas) músiko/kantante, pintor, un (òf mas) persona ku ta traha un obra di man na e sitio òf personanan ku ke hasi un presentashon teatral. E persona(nan) aki en prinsipio ta permití pa pone un parasòl, un mesa i un stul na e sitio si nan ta deseá di hasi esaki durante nan presentashon.

 

Pa por bini na remarke esnan interesá lo mester hasi un petishon pa un standplaatsvergunning na Lokèt di Pèrmit situá na Saliña 127 pegá ku Subway. Huntu ku e standplaatsvergunning e artista lo tin mester tambe di un (doorlopend) evenementenvergunning di Ministerio di Hustisia kual tambe e por hasi petishon p’e na Lokèt di Pèrmit. Si akaso e artista ta deseá di risibí teps serka su públiko esaki lo mester di un pèrmit apart di polis pa esaki.

No tin un kriterio pa kantidat di persona ku por okupá un puesto pa artista, pues e pèrmit por wòrdu pidi tambe pa un grupito artístiko. Importante ta si, pa e grupo di persona aki mantené su mes denter di e kantidat di espasio ku ta wòrdu indiká den su pèrmit.

Na e momentunan aki tin 4 espasio artístiko disponibel na Plasa Brion, 2 na Molenplein, 5 na Parke Wilhelmina i 1 den e hanchi na Madurostraat.

Ministerio konserní

Bo opinion