Notisia

Ban Topa pa produktornan di artesania lokal i ‘standhouders’

Geplaatst op 27 Mart 2019 dor di Ministerio di Desaroyo Ekonómiko

WILLEMSTAD-  Resientemente Ministerio di Desaroyo Ekonómiko a instalá un tim di trabou ku e meta pa definí kiko ta ser konsiderá artesania lokal i bin ku reglanan pa duna prioridat na benta di artesania lokal prinsipalmente na e stèntnan ubiká den sentro di siudat. E tim ta konsistí di aktornan ku di un òf otro manera ta enbolbí ku e materia aki. Ta trata di Kas di Kultura, Ofisina di Turismo di Kòrsou (CTB), Sekretariado di UNESCO Curaçao, Ministerio di Enseñansa Siensia Kultura i Deporte, e plataforma kreativo Passionistas, e merkado online pa kreativonan Karibense THACHED Heritage, Fundashon Marshe i di representantenan di Ministerio di Desaroyo Ekonómiko. Dia 3 di mei próksimo e tim di trabou ta organisá na Marshe Rondó un Ban Topa pa pone produktornan di artesania lokal i ‘standhouders’ den kontakto ku otro.

 

Artesania lokal ta produktonan produsí na Kòrsou kompletamente na man òf ku yudansa di instrumento manual. E artesania lokal por tin un diseño práktiko, estétiko, artístiko, kreativo, moderno, dekorativo, simbóliko i signifikativo kaminda e kultura, historia, geografia i ambiente di Kòrsou ta keda representá.

 

Último añanan por nota un interes grandi pa produktonan traha lokal. E kantidat di merkadonan ku ta keda organisá estilo ‘pop-up’ (temporal) ku benta di artesania a subi enormemente. Sinembargo ora bo bishitá e stèntnan ubiká den sentro di siudat, bo no ta mira e artesania lokal bon representá.

 

Pa e motibu aki e tim di trabou ta organisá un Ban Topa estilo di ‘matchmaking’ pa pone e produktor di artesania lokal i e bendedó di artesania den kontakto ku otro. Ministerio di Desaroyo Ekonómiko ta hasi un yamada na kada produktor ku ta produsí artesania lokal na kantidat i riba un base regular, pa partisipá na e Ban Topa. Lo tin un nochi di informashon dia 11 di aprel próksimo. Pa registrá manda un mail na info.meo@gobiernu.cw òf yama 462-1444 ekstenshon 174. Inskripshon ta sera dia 17 di aprel. Kontribushon pa e Ban Topa ta Naf 25,-.

Ministerio konserní

Bo opinion