Notisia

Bishita di Minister Zita Jesus-Leito na Aruba tabata unu sumamente fruktífero.

Geplaatst op 15 Aprel 2019 dor di Ministerio di Tráfiko, Transporte i Planifikashon Urbano

aruba

Willemstad – 11 di aprel último, Minister di Tráfiko, Transporte i Planifikashon Urbano señora Zita Jesus-Leito a realisá un biahe di trabou di 1 dia na hermana isla Aruba. Minister Jesus-Leito a biaha pa Aruba den kuadro di e tour karibense di ‘Hurricane Hunters’ i pa efektuá diferente bishita na koleganan Minister.

‘Hurricane Hunters’ ta e avionnan ku ta bula den orkan pa asina registrá tur dato i karakterístika di esaki. Unabes ku registrá e datonan aki e servisionan meteorológiko rònt mundu ta distribuí i prosesá nan.

Durante e bishita aki, Minister Jesus-Leito a hiba kombersashon ku diferente kolega Minister di Aruba, entre nan Minister President señora Evelyn Wever-Croes, Minister di Transporte, Komunikashon i Sektor Primario señor Romero, i Minister di Infrastruktura, Planifikashon Urbano i Medio Ambiente señor Oduber. Tópiko di e diferente kombersashonnan tabata entre otro retonan i desaroyo komun manera: konsekuensia di refugiadonan di Venezuela pa nos islanan, situashon di transporte públiko, konekshon di fast ferry entre Kòrsou i Aruba, konstrukshon di bibienda sosial, implementashon di e tool “GIS” na Aruba, i maneho di propiedat di gobièrnu manera edifisio i tereno.

Por konkluí ku tantu Kòrsou i Aruba ta konfrontando retonan similar na e momentunan aki. Di un forma kreativo i inovativo mandatarionan mester sòru di krea solushonnan duradero ku ta benefisiá siudadanonan di e islanan.

Komo resultado di e diferente kombersashonnan por menshoná ku e ministernan a hasi palabrashon pa fortifiká lasonan di trabou i asina traha di un forma mas direkto ku otro.  A planeá un enkuentro mas ku minister Oduber pa asina sigui interkambiá idea tokante  e tópiko di maneho di propiedat di gobièrnu. Parti di e palabrashonnan tambe ta ku lo organisá un seshon di interkambio entre departamentonan di infrastruktura i planifikashon urbano di Aruba i Kòrsou.

Minister Jesus-Leito por wak bek riba un biahe fruktífero

Ministerio konserní

Bo opinion