Notisia

Denter di poko tempu Stichting Gaming Control Board lo ser nombrá supervisor uniforme di weganan di azar na Kòrsou

Geplaatst op 20 Desèmber 2018 dor di Ministerio di Finansa

Minister di Finansa, su ekselensia Kenneth Gijbertha pa medio di esaki ta komuniká ku denter di poko tempu Stichting Gaming Control Board lo ser nombrá supervisor uniforme di weganan di azar na Kòrsou.

E supervishon ku GCB lo realisá, ta regardá tur wega di azar ku ta ofresé na òf for di Kòrsou i lo wòrdu ehekutá di forma uniforme riba tur sektor di wega di azar. Supervishon ta trata kumplimentu di tur lèi i regulashon ku tin relashon ku weganan di azar, ofresé na i for di Kòrsou, riba esnan ku ta ofresé i partisipantenan, inkluyendo lèi i regulashon pa evitá i kombatí labamentu di plaka, finansiamentu di terorismo i proliferashon.

Tambe lo hasi uso di e supervishon uniforme aki, pa kombatí weganan di azar ilegal. Esnan ku ta ofresé weganan di azar ilegal ta forma un menasa pa komunidat ya komo e ofresementu no kontrolá ta engrandesé e riesgo di adikshon na guèmbelmentu. Tambe ta asina ku esnan ku ta ofresé weganan di azar ilegal no ta kontribuí na e asina yamá landskas. Esaki pa motibu ku nan no ta paga derechinan di pèrmit òf impuesto riba e entradanan atkerí di manera ilegal aki i nan ta forma kompetensha deshonesto pa esnan ku ta ofresé esaki di manera legal.

Pago di premio no ta garantisá na momentu di partisipá na weganan di azar ilegal, loke ta perhudiká partisipantenan i ta hasi daño na imágen internashonal di Kòrsou. Komo ku no tin kontròl, weganan di azar ilegal ademas ta fomentá práktikanan di labamentu di plaka, terorismo i proliferashon. Ta fèrwagt ku nombramentu di GCB komo supervisor uniforme riba weganan di azar na alto grado lo ta efektivo den protekshon di sosiedat di Kòrsou kontra konsekuenshanan negativo di weganan di azar. 

Minister di Finansa,

K. Gijsbertha

Ministerio konserní

Bo opinion