Notisia

Despues di Investigashon studiantenan di Universidat di Kòrsou ta sigui ku nan stazje.

Geplaatst op 24 Mei 2019 dor di Ministerio di Tráfiko, Transporte i Planifikashon Urbano

Despues di Investigashon studiantenan di Universidat di Kòrsou ta sigui ku nan stazje.

Willemstad –  Resientemente komunidat di Kòrsou por a tuma nota di diferente komentario den prensa i tambe riba medionan sosial, relashoná ku skorsing di stazje di studiantenan di Universidat di Kòrsou ku ta kore stazje na un servisio pa Obra Publiko (UOOW), ku ta forma parti di Ministerio di Tráfiko, Transporte i Planifikashon Urbano. Komo ministerio i organisashon responsabel ta importante pa aklará e situashon.

Gobièrnu di Kòrsou meskos ku gran mayoria di organisashon den sektor priva tin un kódigo di kondukta ku ta stipulá e komportashon deseá di kada trahadó.Den kaso di empleadonan públiko e kódigo di kondukta ta derivá for di  Landsverordening Materieel Ambtenarenrecht (LMA).

Artíkulo 4 insiso 1 di LMA ta bisa; un empleado públiko no ta hasi uzo òf mal uzo di informashon ku el a haña den su funshon, no pa su mes ni pa otro. E empleado públiko ta prohibí pa suministrá informashon, distribuí òf publiká informashon di kua e ta sospecha di ta konfidensial. Ku esei e ta violá su obligashon di sekresia. Maske no ta trata direktamente di informashon konfidensial, e no por hasi uzo di e informashon ei òf poné na disposishon di otro òf hasi nan públiko sin mas. Den hopi kaso e mes no ta outorisá pa publiká informashon komo ku esei ta tarea di e funshonario enkargá ku komunikashon. Esaki ta konta tambe pa tur hende ku ta empleá di un òf otro manera dor di Gobièrnu, por ehèmpel personanan ku tin un kontrato di trabou, òf otro tipo di akuerdo.

Den e kaso spesífiko aki ta trata di studiantenan ku ta bezig ku nan investigashon final. Nan a duna un presentashon  na prensa a base di informashon ku no a keda kontrolá, segun prosedernan komun, di Universidat di Korsou. Ademas e studiantenan no tabata outorisá pa publiká e informashon aki, pa kual motibu a tuma medida temporal, den forma di skorsing di e periodo di stazje. Sinembargo despues di a hasi investigashon i hiba kombersashon ku UOC a tuma e desishon ku djaluna, 27 di mei 2019, e tres hobennan aki lo reanuda nan stazje, pa por finalisa nan estudio.

Ministerio di Tráfiko, Transporte i Planifikashon Urbano ta lamentá ku e 3 hóbennan aki a haña nan mes embolbí den e kaso penoso aki.

Ministerio konserní

Bo opinion