Notisia

Di tres konsulta tripartit den konteksto di sigui mehorá mekanismonan pa mas kolaborashon entre paisnan

Geplaatst op 18 Yüni 2019 dor di Ministerio di Asuntunan General i Promé Minister

WILLEMSTAD – Djaluna 17 di yüni 2019 a tuma lugá e di tres konsulta tripartit entre Kòrsou, Aruba i Sint Maarten. Promé Minister di Kòrsou, Eugene Rhuggenaath, Promé Minister di Aruba, Evelyn Wever-Croes i Promé Minister di Sint Maarten, Leona Romeo-Marlin, a reuní e biaha akí na Kòrsou pa papia tokante varios tópiko ku ta konserní tur tres pais. Liña kòrá di e reunion ta kontinuashon di loke a bin dilanti durante e promé dos konsultanan tripartit, esta ku huntu mester keda mehorá tur mekanismo pa un kolaborashon boluntario mas estrecho entre e paisnan outónomo den Reino.

Punto di salida – a base di e konvenio di Savaneta ku a firma na yanüari último – ta ku huntu e tres paisnan, ku ta enfrentá mesun retonan, ta para mas fuerte. Esaki ta enserá ku e paisnan, saliendo for di kada un su reponsabilidat komo pais outónomo, ta mira espasio pa traha huntu i siña di otro. A para entre otro ketu na e parti di migrashon, en partikular relashoná ku e situashon di Venezuela, kaminda Konseho Sosial Ekonómiko (SER) di Kòrsou tambe a duna un presentashon di resultadonan di e simposio tokante migrashon, ku a tuma lugá na luna di mei. Tur tres pais ta di akuerdo ku ta nesesario pa riba e tereno akí trata na hasi eskohonan mas tantu posibel konhuntamente, ya ku desishon di un pais por tin influensia riba e otro paisnan. Un otro tópiko di gran importansia ta e parti di Integridat. Tur tres pais ta ehekutando diferente proyekto na e momentu akí ku intenshon di halsa e nivel di integridat den gobernashon i e aparato públiko. Paralelo na esaki ta introdukshon di sistemanan di digitalisashon pa asina Gobièrnu ta mas transparente, por brinda mihó servisio i kombatí korupshon. Tantu Aruba komo Sint Maarten tin kontakto ku Estonia, ku ta un di e paisnan mas avansá riba tereno di eGovernment, i ta kompartí e konosementu ku nan ta optené for di esaki ku Kòrsou.

Seguidamente Promé Minister di Kòrsou a ekspresá su deseo pa un sentro di ekselensia pa por ehèmpel Karibe Hulandes. Meta ta pa yega na instrumentonan di kolaborashon ku ta yuda e islanan ta mas resistente pa sierto desaroyonan. Importante den e proseso akí ta pa intesifiká e relashon ku otro paisnan den region Karibe. Riba tereno ekonómiko tambe ta mira hopi oportunidat pa internashonalmente i regionalmente kada un pais sigui profilá i asina atraé invershonistanan. Tambe a wak mas aleu kiko ta e posibilidatnan pa hasi mas komersio entre e tres paisnan i riba nivel di Reino.

Den seno internashonal e tres paisnan ke bai yega na palabrashonnan konkreto kon pa partisipá di forma mas efektivo na eventonan internashonal, manera e Reunion General di Nashonnan Uní (AVVN) ku ta tuma lugá na New York sèptèmber benidero. Esaki den kuadro di e tema ‘small island developing states’ (SIDS) i su desafionan. Alabes a papia di e posibilidat pa huntu – i kisas ku otro pais ku ta forma parti di OCTA – hasi un ‘assessment’ den kuadro di ‘Doing Business Report’ di World Bank. Di e forma akí ta hasi posibel pa dado momentu kai den e ranking mundial di paisnan ku ta regulá e sektor empresarial.  

Teniendo kuenta ku e relashon ku tin ku no solamente Hulanda, pero tambe ku mas pais den Oropa, e tres paisnan lo sigui buska formanan efektivo pa yega na remarke pa fondonan di desaroyo ku Union Oropeo ta pone disponibel. Pa loke ta e aspketo di Visa, ta kanando e kamindanan nesesario ku Hulanda a base di palabrashonnan konhunto di e direkshon ku ke bai. 

Den kuadro di sigui mehorá situashon finansiero di e paisnan, lo kontinuá e tópiko di ekonomia durante e siguiente konsulta tripartit. Esaki ku partisipashon tambe di e Ministernan di Desaroyo Ekónomiko di kada un pais. Na fin di e konsulta tur tres Promé Minister a indiká un bes mas nan kompromiso pa ku otro i nan deseo pa e kolaborashon akí sigui krese i bira algu strukturalmente di e paisnan pa años ku bin.

Ministerio konserní

Bo opinion