Notisia

Diskurso nashonal aña 2019 di Promé Minister di Kòrsou

Geplaatst op 2 Yanüari 2019 dor di Ministerio di Asuntunan General i Promé Minister

lenk pa vershon oudiovisual: https://we.tl/t-QwhzyqHiR2

Kerido ko-suidadanonan, un felis anochi,

Na promé lugá mi ke deseá abo i bo famia un felis aña 2019.  Ta mi sinsero deseo ku e aña aki ta yená ku salú, dicha i momentunan di felisidat p’abo i bo famia.

Komo bo Promé Minister, mi ta honrá di por dirigír mi mes n’abo, na komienso di un aña nobo; ku semper ta un momento pa definí aspirashon i metanan nobo.

2018 tabata un aña kaminda nos mester a dil ku desafio i kambionan grandi. Tantu den pais komo ku den hopi kasnan di famia.

Mi ta konvensí ku 2019 tei bira un aña kaminda Huntu nos tei skibi historia.

2019 mester bira e aña den kua, kada yu di tera, mester bolbe kuminsá sinti ku nos tin motibu di ta optimista, pa loke ta futuro di nos pais i bienestar den nos kas. Tin hopi desaroyo ku ta duna nos speransa ku nos lo logra un futuro mas stabil, prospero i yen di persektiva.

No opstante tur e retonan imensamente grandi pa ku futuro di nos pais, ku nos mester a enfrentá den 2018, nos por mira bèk i konstatá ku e trabou duru di henter Gabinete Rhuggenaath pa bòltu e blachi i skibi un kapitulo nobo pa nos pais, ta kuminsa duna su fruta. Ta un realidat ku:

  • Nos ta den un posishon serio, pa kaba di negoshá ku un partner stratégiko renombrá pa manehá, operá i modernisá nos refineria despues di 2019. Un desishon difisil ku mi mester a tuma den porta di 2018, pero ku awor ta nifiká ku nos pais por spera mihó pa nos sektor petrolero.
  • Despues di 180 aña nos ta bai tin un hòspital nobo; den e aña i mei ku a pasa, a dal pasonan firme pa pone e transishon pa hospital nobo kana.
  • Invershonistanan notabel manera Damen i Corendon ta demonstrando aktivamente konfiansa den nos pais i den luna di yanüari aki lo tin mas ku 25 kompania ku lo bishitá Kòrsou den kuadro di e enkuentro di invershon: Bon Bini for Business.
  • Nos invershonistanan lokal tambe ta demonstrando konfiansa ku invershonnan supstansial den turismo, manera na Marichi i Sta. Martha, pero tambe den otro sektor manera agrikultura; den kua gobiernu tambe a inisiá kunukito den bario.
  • Nos deportistanan,artistanan, akademiko i profeshonalnan ta keda hasi nos orguyso di ta chiki na tamaño pero grandi den mundu.

Kompatriotanan,

Mas ku klaro mi ta rekonosé ku parti di nos realidat ta keda, ku ainda nos pais ta den un situashon kaminda situashon finansiero di Gobièrnu ta fragil i no tin tur e kuponan di trabou deseá. Tin basta desaroyo ku debidamente ainda nos mester frena i koregí, i tin desishonnan ku nos mester tuma p’asina nos por yega na É pais kaminda tin adelanto sosial i ekonómiko, p’esnan ku mas tin mester di dje i kaminda nos tur por biba mas felis riba nos isla.

Gobièrnu a skohe  pa un strategia di kresementu, pa fortifiká nos aparato públiko, mehorá nos atministrashon finansiero i nos abilidat di fasilitá desaroyo ekonómiko; ku e meta pa konstruí un fundeshi mas fuerte i resistente. Esaki nos ta bai hasi dor di buta un spil dilanti nos mes i wak unda mester realisá mas efisiensia, duna mihó servisio i unda mester ta mas agil.

Mi kier ripití loke mi a yega di bisa kaba: “Mare adelanto ta algu ku ta bini di awe pa mañan.”

Adelanto ta nase for di speransa. Pasó ora nos mantené speransa, nos tin forsa pa realisá loke nos ta visualisá.

Adelanto ta bini ku kurashi. Kurashi pa tuma desishon, pa pensa i hasi diferente pa logra kambio positivo.

Adelanto ta bini ku persistensia, paso tin ora e kaminda ta largu i difísil. Pero esun ku persistí ta pruf e dushi sentimentu di viktoria.

Adelanto ta bini ku fe. Fe den Dios i fe den bondat di bo próhimo i e kompromiso ku #huntu nos tin ku nos komunidat i nos pais.

Shonnan,

Adelanto i felisidat di un pueblo bo no ta midi na e kantidat di sèn ku tin ta lora den un komunidat. Pa un pueblo ta felis, e mester tin e sentido ku e ta sirbí den su nesesidat i ta garantisá di oportunidat i bienestar. P’ami, bienestar ta real ora:

  • Kada un di nos ta sinti ku Kòrsou di bèrdat ta brinda oportunidat na e yu di tera; 
  • Ku no opstante nos diferensianan, tòg nos sa di kombibí i buska moda pa huntu nos progresá;
  • Ku nos ta kompartí, e tiki ku nos por tin ku otro. Sin esaki, adelanto lo no ta adelanto pa nos tur.

Pero, adelanto i bienestar .. no ta asuntu di gobièrnu so. Ta asuntu ku kada un di nos ta karga nos responsabilidat i tuma inisiativa pa nos mes i nos famia progresá. Nos mester por kere den nos mes i nos kapasidat; lanta mira oportunidat i kue tene duru.

Selebrashon di nos fiestanan kultural manera Karnaval i Seú, ta ehèmpelnan kon ora kada un di nos hasi nos parti i kontribuí, nos por logra kos grandi di bèrdat. Si nos por hasi esaki pa e dos aktividatnan aki, dikon no usa e mesun kreatividat, disiplina i kapasidat-di-organisá pa huntu nos krea mas speransa i bienestar pa nos tur?

Den bida ta un kaminda tin pa kana i logra éksito; esei ta ku trabou duru, kompromiso i perseveransha. Esun ku kere ku e por logra gloria sin hasi sakrifisio, ta gaña su mes. Meskos ku abo, gobièrnu tambe mester adaptá  i presta pa nos pais por progresá na un manera stabil.

Pueblo di Kòrsou,

Formashon di nos yunan i guia di lidernan, ku di bèrdat tei pa sirbí komunidat,  ta puntonan ku na mi pareser meresé nos atenshon, si di bèrdat nos ke krea speransa i bai dilanti.

Nos yunan meresé e mihó oportunidat den bida. Sinembargo tur dia di nobo nos ta topa ku muchanan i hóbennan, ku debí na nan formashon for di kas, ta biba un bida difísil i yen di sufrimentu, manera por a mira den e dianan resien aki. Nos yunan meresé mihó.

Ta deber i responsabilidat di kada un di nos, komo mayor, pa duna nos yunan for di e edatnan mas hóben, un bida yená ku sufisiente amor i atenshon. Nada ni niun hende no por remplasá e amor i dedikashon di un mayor na su yu.

Gobièrnu ta yuda, kaminda di bèrdat tin mester, den kuadro di por ehèmpel programa di urgensia i otro trayektonan pa desaroyo sosial.  Esaki lo keda prioridat.

Gobièrnu kier rekonosé i yama danki na kada un suidadano hóben i adulto ku ta traha pa aportá inkansablemente na nos pais. Paso ta #Huntu nos ta konstruí pais!

Na tur lider ku ta sinti nan yamá pa sirbí nos komunidat, no warda pa niun hende duna bo un batuta. Lant’ariba, den kas, den bario, na skol i den komunidat, i ban traha huntu ku kreatividat i dedikashon pa nos pais.

Den  mesun rosea mi ke boga tambe pa lidernan, sin importá si bo ta polítiko, sindikalista, komersiante, reportero, riba trabou òf boluntario .. ta konsiente di bo mes i bo responsabilidat pa forma otro lidernan pa futuro. Ningun komunidat por bai dilanti kaminda konstantemente lidernan ta pone únikamente nan mes interes dilanti, ta antagonisá pa kibra otro i konstantemente ta mantené desunion bibu pa sirbi nan propio kousa. Nos mester di lidernan ku ta sirbi otronan.

Gobièrnu a komprometé pa pone e spil su dilanti i wak den su mes kas unda nos ta bai kuminsá mehorá i krese. Komienso di 2019 ta un bon oportunidat pa tur persona reflekshoná i komprometé ku e kousa di traha ku integridat na interes general i hiba henter pueblo di Kòrsou dilanti. Ami tambe lo hasi esaki....

Ban kana huntu den direkshon di prosperidat pa un i tur. Ban traha huntu pa e adelanto tan deseá.

Kerido pueblo,

Den 2019, kuminsando awe, Huntu nos tei krea e fórmula pa e Kòrsou éksitoso i felis, di awe, mañan i futuro.

Felis anochi i Dios bendishoná Kòrsou.

Ministerio konserní

Bo opinion