Notisia

E PROMÉ MITAR DI AÑA 2019 KU NOTANAN POSITIVO PA SEKTOR TURÍSTIKO

Geplaatst op 22 Ougùstùs 2019 dor di Ministerio di Desaroyo Ekonómiko

WILLEMSTAD- E promé seis lunanan di aña 2019 a marka un inisio sumamente positivo pa nos sektor turístiko. Esaki minister di Desaroyo Ekonómiko, Sr. Kenneth Gijsbertha a duna di konosé den un konferensia di prensa huntu ku Ministerio di Desaroyo (MEO) i partnernan turistiko Curaçao Tourist Board (CTB), Curaçao Hospitality & Tourism Assosiation (CHATA) i Curaçao Ports Authority (CPA).


Periódikamente MEO, CTB, CHATA i CPA a bin ta tene konferensia nan di prensa den kual kada organisashon ta duna informashon balioso na pueblo pa loke ta trata desaroyonan turístiko pa e periodo tras di lomba.
Ta un echo ku e sektor turístiko ta un pilar fuerte pa ku e kresementu ekonómiko di nos pais.
Turismo ta un sektor ku ta keda trese invershonnan balioso pa Kòrsou, generá kuponan di trabou i alabes e sektor ta representá un konekshon indispensabel ku diferente otro sektornan ku turistanan ta hasi uso di dje miéntras esakinan ta di bishita riba nos pais.

Pa loke ta trata e periodo di yanüari pa yüni 2019 e sektor di turismo a floresé di tur banda.

Curaçao Tourist Board (CTB) a raportá un kresementu di 16% den turista di estadia ku a keda risibí durante e promé 6 lunanan di 2019 kompará ku e mesun periodo aki aña pasá. E 6 merkadonan prinsipal a sòru pa 78% di e total di bishitante; 41% for di Hulanda, 17% for di Merka, 6% for di Colombia, 5% for di Alemania i 3% for di Brasil. Aparte di esaki, CTB a promové Curaçao North Sea Jazz Festival (CNSJF) intensivamente den su merkadonan di mas importante riba diferente plataforma i lo konta ku presensia di prensa internashonal pa kubri e evento próksimamente.

Ademas di CNSJF a hasi diferente otro kampaña di promoshon pa nos isla den eksterior uzando e ‘branding’ internashonal ku e slogan ‘Sintié pa Bo Mes’, ‘Feel It For Yourself’ ku ta keda hala atenshon pa su kolonan vibrante.

Durante e promé 6 lunanan di aña 2019 CTB a duna tambe diferente kurso manera entre otro: Kurso di Servisio na Kliente i Kurso di Seguridat den Turismo na entre otro; diferente Hotèl, Fundashon Kuido di Ambulans Kòrsou, Kuerpo Polisial Kòrsou, kompanianan di Car-Rental, Sinusta Taxi Curaçao, Thirty Steps Association, Konsulado di Estádos Unídos i di Sürnam pa nombra algun. E kampaña di konsientisashon Kòrsou ta Dushi tambe tabata hopi aktivo durante e promé parti di 2019. Huntu ku Ministerio di Salubridat, Medio Ambiente & Naturalesa (GMN) a traha i lo sigui traha den e di dos parti di e aña aki tambe riba elevá i mantené nos playanan agradabel i aksesibel pa nos mes hendenan i nos bishitantenan.

Curacao Hospitality & Tourism Assosiation (CHATA) tambe ta raportá kresementu den prestashon hotelero den e lunanan tras di lomba. Pa loke ta trata okupashon di hotèl den e periodo aki, CHATA ta indiká ku nos por a eksperensiá un oumento di 2.0% kompará ku  e mesun periodo aki na 2018.

E tarifa promedio diario (ADR) i e entrada pa kamber disponibel (RevPAR) tur dos tambe a konosé un oumento den e di 2 kuartal di 2019.

E tarifa promedio diario (ADR) a subi ku 3.9%; di $139.53 pa $144.98.

E entrada pa kamber disponibel (RevPAR) a subi ku 7.2%, di $93,44 pa $100,19.

Mas aleu sr. Mercera di CHATA a elaborá riba proyektonan benidero manera:  apertura di Marriott Hotel dia 15 di òktober 2019, Dreams Curaçao Resort Spa & Casino ku lo habri su portanan 15 di desèmber 2019, Corendon Mangrove Beach Resort Curaçao planiá pa aprel 2020 i tambe Courtyard Marriott den ougùstùs di 2021. Tambe sr. Mercera a menshoná e transformashon di loke tabata hotèl Howard Johnson, e proyekto na Santa Martha i tambe desaroyonan di e parke di pal’i mangel na ref.

Di akuerdo ku CPA,turismo krusero tambe a konosé un kresementu den e promé mitar di aña 2019. De echo, Kòrsou a risibí un total di 5.1% mas tantu barku krusero den e periodo di yanüari pa yüni 2019 kompará ku e mesun periodo aki den 2018. Na aña 2018 esaki tabata un total di 157 barku krusero entre yanüari i yüni miéntras pa 2018 nos a risibí un total di 165 barku den e mesun temporada aki. E oumento den kantidat di barku krusero ku a mara na un di nos puertonan a nifiká alabes un oumento di 5.9% den e kantidat di turista krusero ku a bishita nos pais den e temporada tras di lomba. Pa e promé mitar di 2019 ya Kòrsou a risibí un total di 419,832 turista krusero.

Durante e konferensia di prensa aki MEO tambe a splika ku a base di e sifranan aki ta proyektá ku den e promé seis luna di aña 2019 e sektor di turismo a generá un total di 1.1 bion florin pa nos ekonomia lokal. Si e trènt di kresementu turístiko aki kontinuá pa e sobrá di e aña ta proyektá ku esaki lo kontribuí na un impakto makroekonómiko positivo pa nos pais den 2019.

Riba página di Facebook di Ministerio di Desaroyo Ekonómiko e presentashon di e diferente stakeholdernan huntu ku detayenan di tur e sifranan ariba menshoná lo ta disponibel.

 

 

Ministerio konserní

Bo opinion