Notisia

Elenko artístiko kurasoleño a representá Kòrsou.

Geplaatst op 30 Mart 2019 dor di Ministerio di Enseñansa, Siensia, Kultura & Deporte

Willemstad- Kòrsou a keda invitá komo e promé pais na e di 11 edishon di un di e festivalnan di vallenato mas grandi di Colombia ku ta Festival Fransisco el Hombre ku a tuma lugá na la Guajira, Riohacha. Despues di dies aña e organisashon di e Festival menshoná a yega na un fase nobo kaminda a inisiá e internashonalisashon di e festival den kuadro turístiko i den kuadro komersial.

Gobièrnu di la Guajira a skohe Kòrsou pa ta e promé pais invitá na e festival i na kua e festival a wòrdu dediká. Un di e motibunan ta e relashon speshal entre Kórsou i Riohacha, teniendo kuenta ku e promé akordeonnan ku a keda introdusí na Colombia via Riohacha a keda importá pa un yu di nos tera, un yu di Kòrsou.

Den e kuadro aki e gobièrnu di La Guajira a solisitá interkambionan kultural di nos artistanan riba diferente área, i ku gobièrnu di Kòrsou a respondé ku entre otro:
- un agrupashon músikal bou di guia di sr Randall Corsen i nos Rei di Tumba;
- un kaha di òrgel akompañá pa su wiri;
- un representashon artesanal;
- dos pareha presentando nos bailenan folklóriko i
- representashon di gastronomia i arte kulinario.

Banda di e festival diferente aspekto di importansia di desaroyo di e pais a keda diskutí i elaborá. E festival a hasi uzo di forsa di “Ekonomia Oraño” (mundu di arte i kreatividat) pa elaborá riba diferente área. Pa medio di interkambio artístiko i kultural a logra pone enfoke riba diferente área manera menshoná ariba ku ta e áreanan ekonómiko i turístiko.

Gobièrnu di Kòrsou ta gradisí Gobièrnu di la Guajira i alabes Curacao Tourist Board (CTB) pa a yuda karga e gastunan pa realisá e mishon importante akí i duna balor na nos artistanan i e mundu kreativo ku na poko okashon ta haña oportunidat pa demostrá nan potensial den e forma organisá i internashonalisá.

*********************************** 

Ministerio konserní

Bo opinion