Notisia

Enkuentro di 4 Ministernan di Hustisia di Reino durante JVO tabata fruktífero

Geplaatst op 23 Yüli 2018 dor di Ministerio di Hustisia

Willemstad - Dia 16 i 17 di yüli último e di 15 Justitieel Vierpartijen Overleg (JVO) a tuma lugá. E konsulta aki entre e 4 Ministernan di Hustisia di Reino Hulandes ta tuma lugá kada 6 luna i kada biaha un otro pais den Reino ta e anfitrion. E pais anfitrion a la bes ta presidí e reunionnan konserní. Siendo Islanan BES e anfitrion, e biaha aki e JVO entre minister Ferdinand Grapperhaus (Hulanda), minister Andin Bikker (Aruba), minister Quincy Girigorie (Curaçao) i minister Cornelius De Weever (Sint Maarten) a tuma lugá na Boneiru.

Minister Girigorie ta wak bèk ku satisfakshon riba un JVO ku tabata intensivo pero ku resultadonan positivo. Durante e konsulta a elaborá riba entre otro diferente forma di atendé ku krímen organisá i kon pa sigui uni forsa pa por kombatí esaki ku éksito. A diskutí ampliamente tokante renobashon di e kolaborashon entre RST i e kuerponan lokal, kon pa mehorá kontrol di nos kostanan i kon pa ehekutá e lei Europeo nobo pa ku interkambio di datonan personal.

Algun desishon importante ku a keda tumá ta entre otro e aprobashon di e Plan di Maneho di Wardakosta 2018-2021 ku e meta pa yega na mehorashon di su funshonamentu. Tambe den kuadro di seguridat di fronteranan, a lanta un grupo di trabou ku lo evaluá e posibilidat pa yega na un sistema digital di kontrol di fronteranan (APIS) pa tur pais den Reino. E sistema aki tin di aber ku kompartimentu di informashon di personanan ku ta biaha di un pais pa otro. Resientemente Korsou a firma un MOU ku Caricom pa atkirí i implementá e sistema aki via di Caricom. Mas aleu a disidí pa kada 4 aña, evaluá e MOU tokante trafikashon di hende. Huntu ku esaki a aprobá un sistema di análisis kontinuo (Baseline) di riesgo di nos kostanan aéreo i marítimo, ku lo kontribuí na halsa e nivel di seguridat di kostanan di e diferente paisnan di reino.

Na final di e JVO e 4 ministernan a firma e lista di desishonnan i tambe den presensia di algun komandante di brantwer di e diferente paisnan nan a firma e kontrato di kolaborashon entre e kuerponan di bombero di Kòrsou, Aruba, Sint Maarten, islanan BES i kuerpo di bombero di Hulanda. E akuerdo di kolaborashon aki ta un paso pa formalisá koperashon entre e kuerponan den Reino pa asina por garantisá kompartimentu di informashon, “best practices” i konoosementu entre e kuerponan den Reino p’asina brinda miho servisio na nos komunidat. Tur e ministernan a afirmá un biaha mas kon importante ta pa traha huntu komo paisnan di reino riba e tereno hudisial i uni forsa pa por garantisá seguridat den tur pais di reino. E siguiente JVO lo tuma lugá na yanüari 2019 na Aruba.

Ministerio konserní

Bo opinion