Notisia

Enseñansa responsabel na Kas

Geplaatst op 7 Sèptèmber 2018 dor di Ministerio di Enseñansa, Siensia, Kultura & Deporte

Gobièrnu di Kòrsou a introdusí un proyekto piloto di Enseñansa na Kas (Thuisonderwijs/TO).

E proyekto akí ta brinda mayornan o tutornan e oportunidat pa duna nan yu(nan) enseñansa na kas. Esaki ta posibel solamente bou di sierto kondishonnan ku a keda stipulá dor di gobièrnu. Konforme e lei di enseñansa obligatorio vigente, mayornan o tutornan por haña dispensashon solamente na momentu ku:

1. E mucha ta mental i físikamente limitá òf;

2. E mayornan ta argumentá ku a base di nan ideologia di bida spesífiko, ningun skol na Kòrsou no por brinda e servisio pa nan yu(nan).

Aktualmente e lei di enseñansa obligatorio ta den revishon i pa e motibu aki gobièrnu den su empeño pa sigui brinda oportunidatnan i krea mas perspektiva nobo den enseñansa, a bai di akuerdo ku e proyekto piloto di Enseñansa na Kas.

Meta:

Meta di e proyekto piloto ta pa garantisá ku tur mucha na Kòrsou ta hasi uso di nan derechi riba enseñansa i pa sòru ku ningun mucha no ta kai for di e sistema di enseñansa pa asina por yega na 0-dropout segun e Akuerdo di Gobernashon 2017-2021. Gobièrnu ta realisá ku Enseñansa na Kas ta un di e posibilidatnan pa brinda enseñansa na muchanan i pa e motibu akí ta hasiendo adaptashonnan den e Ordenansa di Enseñansa Obligatorio (Leerplichtslandverordening).  Ku introdukshon di e proyekto piloto akí, gobièrnu ta uni su mes den e desaroyo global den kua enseñansa den un konsepto moderno i responsabel ta ser duná na nos mucha i hóbennan.

Mayornan:

Ya tin diferente mayor ku a akudí na Ministerio di Enseñansa, Siensia, Kultura i Deporte pa forma parti di e proyekto aki. Minister Marilyn Alcalá-Wallé a reuní ku e mayornan i a duna nan informashon tokante di e proyekto. Tambe nan a risibí e kondishonnan ku nan mester tene nan mes na dje. E mayornan ta sumamente kontentu ku gobièrnu a skucha nan, tuma akshon i brinda e oportunidat aki. Nan ta gradisí gabinete Rhuggenaath i Minister Marilyn Alcalá-Wallé, komo representante di gobièrnu pa e proyekto piloto.

Puntonan di akshon:

Awor ku e proyekto piloto a keda akordá den Konseho di Minister, Ministerio di Enseñansa, Siensia, Kultura i Deporte ta bai sigui traha riba e lei adaptá di enseñansa obligatorio i alabes kaba di refiná i  stipulá e maneho di Enseñansa na Kas pa den futuro. Mayornan tambe ta keda inkluí den e parti di evaluashon di e trayekto. Ta bai hasi uso di nan eksperensia i feedback durante, i na final di e proyekto piloto pa asina por garantisá un maneho den un marko mas mihó i funshonal posibel. Di e forma aki un biaha mas gobièrnu ta garantisá ku tur mucha, inkluyendo esnan ku ta risibí dispensashon, ta risibí enseñansa den un forma korekto i segun kondishonnan responsabel.

Riba potrèt por mira e reunion di Minister di Enseñansa, Siensia, Kultura i Deporte (ESKD), sra. drs. Marilyn Alcalá-Wallé, ku e tim di Ministerio di ESKD, huntu ku e mayornan den kuadro di e proyekto piloto di Enseñansa na Kas.

Pa e komunikado den PDF por klik aki: Komunikado relashoná ku proyekto piloto Enseñansa na Kas i pa e kriterionan por klik aki: Kriterionan (Voorwaarden TO) pa Enseñansa na Kas

**********************************************************************************************

Ministerio konserní

Bo opinion