Notisia

‘Factfinding missie’ di balor grandi pa mas kolaborashon ku Kòrsou

Geplaatst op 17 Mei 2019 dor di Ministerio di Asuntunan General i Promé Minister

WILLEMSTAD/DEN HAAG - Kòrsou ta wak bèk riba un bishita di trabou eksitoso di un delegashon komershal di e organisashonnan Hulandes ‘Toegepast-Natuurwetenschappelijk Onderzoek (TNO), ‘ECN part of TNO’, ‘TNO Caribbean’ i ‘Port of Rotterdam’ na e isla. TNO ta representá algun otro kompania tambe ku ta partisipá na e mishon.

E ‘factfinding missie’ di tres dia ta duna tantu kompanianan Hulandes komo lokal i Gobièrnu di Kòrsou sufisiente punto di referensia pa mas koperashon.

Gabinete di Minister Plenipotensiario di Kòrsou (KGMC) ta partisipá na e mishon tambe i ta ser representá dor di Sascha Mercer, konsehero di maneho riba tereno di Desaroyo Ekonómiko di KGMC.

Interes
Djaweps 16 di mei último den Renaissance Hotel Minister di Tráfiko, Transporte i Planifikashon Urbano, sra. Zita Jesus-Leito, e duna inisio di e bishita di trabou. Durante e promé enkuentro akí ku e delegashon el a enfatisá e importansia di e bishita di organisashonnan i empresarionan Hulandes. Gobièrnu di Kòrsou ta altamente aploudí e tipo di inisiativanan akí ku ta kontribuí na mehorashon di kresementu ekonómiko.

‘Living Lab’
Den oranan di atardi Promé Minister Eugene Rhuggenaath a risibí e komersiantenan den Fort Amsterdam. El a haña un presentashon amplio di TNO tokante di e sistema ‘living lab.’ Den e sistema akí ta tèst inovashonnan den práktika pa medio di implementashon di investigashonnan den práktika komun den e ‘living lab’. Un komunidat grandi ku ta konsistí di sektor privá, gobièrnunan i institutonan di investigashon ta forma e ‘living lab’.

Promé Minister Rhuggenaath a haña  e sistema di ‘living lab’ hopi interesante i e ta mira hopi hopi oportunidat pa Kòrsou. “Nos ta disponé di hopi talento akinan i lo por desaroyá hopi den e ‘living lab’. Den e kuadro di por ehèmpel energia duradero e ‘living lab’ por mustra nos di forma práktiko kon kosnan por tuma lugá. Esaki ta ofresé Kòrsou perspektiva i tambe ta duna inisiativanan mas chèns pa resultá.”

Koperashon estrecho
Mas lat den dia e delegashon di komersiantenan i Ministerio di Asuntu General, Ministerio di Tráfiko, Transporte i Planifikashon Urbano i Ministerio di Desaroyo Ekonómiko a reuní ku otro. E ‘Factfinding missie’ a duna e ministerionan un presentashon ekstenso di su metanan i e posibilidat pa koperashon mas estrecho, pa asina duna kontenido na e MoU ku Kòrsou i instituto di investigashon TNO a firma. Kòrsou ta buska solushon pa problemanan tokante di transishon na energia duradero, planifikashon di espasio i seguridat den tráfiko.

Haf
Tambe tabatin hopi interes pa e aktividat den haf di Kòrsou for di TNO i e Kompania di Haf na Rotterdam. E delegashon di negoshantenan a bishitá Damen Shiprepair, Curaçao Port Authority i Refineria di Kòrsou. E delegashon a bishitá Aqualectra tambe. Riba e di dos dia di e mishon mobilidat, sushi i e sektor kímiko tabata sentral. E grupo a bishitá Curaçao Airport Hato i Autobusbedrijf Curaçao. E delegashon a haña un rekorido den e kompania di purifikashon di awa ‘Klein Hofje’ i splikashon di Selikor tokante di inovashonnan di futuro aspirá.

Durante di e mishon akí ta wak kiko ta e oportunidatnan i kon mester tradusí nan den proyektonan (piloto) konkreto. Banda di bishitá diferente otro ministerionan, e grupo a hasi un bishita tambe na Curaçao Hospitality & Tourism Association (Chata) i Curaçao Tourist Board (CTB). Djabièrnè atardi e delegashon a hasi un bishita kòrtiku serka Representashon di Hulanda na Willemstad (VNW). Erwin Arkebout ku ta Representante di Hulanda na Aruba, Kòrsou i St. Maarten, Hildegard Nefs ku ta Representante suplente i otro miembronan di VNW a risibí nan.

E partisipantenan di e ‘factfinding missie’ – bou di guia di TNO i KGMC – ta mira bèk riba dos dia di mishon eksitoso, den kua e kombersashonnan a ofresé sufisiente puntonan di referensia pa koperashon mas estrecho den futuro.

Ministerio konserní

Bo opinion