Notisia

Favela Street ta krea un generashon nobo di role model ku poder di futbòl di kaya.

Geplaatst op 6 Mei 2019 dor di Ministerio di Desaroyo Sosial, Labor i Bienestar

Djasabra 4 di mei Favela Street Kòrsou a kuminsá ku un proyekto sosial ku ta dirigí riba desaroyo sosial pa medio di deporte. E proyekto lo dura algun aña.  Despues di eksitosamente a forma hóbennan di barionan ménos priviligiá na Brasil i Haiti pa bira ‘coach’, fundadó di fundashon Favela Street, ‘Rocky’ Hehakaija, ta start ku 25 hóben di diferente bario di Kòrsou.    

E proyekto Favela Street ta basá riba e filosofia ku hóbennan tin derechi riba un lugá seif pa topa i hasi deporte huntu. Na barionan kaminda no tin un lugá asina, nos ta purba di krea esaki, ‘Rocky’ ta splika. E fundashon ta hasi esaki formando adulto hóben pa bira coach den futbòl, siñando nan pa duna entrenamentu i organisá eventonan di futbòl den nan mes bario. Na e mesun momentu ta traha paso pa paso na nan desaroyo personal i imahen propio positivo. E partisipantenan ta kuminsá ku organisashon di un evento deportivo (chikí) den nan mes bario i ta haña ‘life skills’ importante ku den bida diário ta útil. Pensa riba organisashon, komunikashon i koperashon. Finalmente e partisipantenan lo krese bira un tim di ‘Favela Street coaches’ ku lo organisá un evento di futbòl grandi pa hóbennan di Kòrsou. Na Kòrsou e programa lo dura dos aña i mei i durante e periodo akí e hóbennan lo sigui tayernan serka ‘Rocky’. 

Roxanne ‘Rocky’ Hehakaija, èks futbolista di tim hulandes, a mustra kiko e ta bal den futbòl femenino na Hulanda i riba nivel internashonal den mundu di futbòl di kaya. Un leshon grave na su rudia a pone fin na su karera profeshonal den e tim Oraño. Na lugá di deskurashá, el a disidí pa kambia rumbo i el a desaroyá e programa di motivashon pa hóbennan yamá Favela Street.

E proyekto Favela Street Kòrsou ta konta ku 26 partisipante, 12 mucha muhé i 14 mucha hòmber di entre otro barionan Barber, Skalo, Montaña (Abou) i Marchena. E proyekto a nase na 2018 den kuadro di e programa di urgensha di gobièrnu di Kòrsou i ta posibel danki na entre otro Ministerio di Desaroyo Sosial Labor i Bienestar (SOAW), Sektor di Desaroyo Sosial ku bista riba desaroyo den bario. Ministro Hensley Koeiman di Ministerio di SOAW a duna inisio simbóliko na e proyekto ku un tiru riba gol den presensia di e hóbennan partisipante. Diferente organisashon di bario i skolnan na Kòrsou manera Maris Stella VSBO na Montaña Fundashon, Un Mihó Opshon, FFK, Van Schepel Foundation i mas.

 

Ministerio konserní

Bo opinion