Notisia

Foro informativo tokante proseso pa yega na desishon balansá relashoná ku suèldo mínimo

Geplaatst op 12 Yanüari 2018 dor di Ministerio di Desaroyo Sosial, Labor i Bienestar

WILLEMSTAD – Ministerio pa Desaroyo Sosial, Labor i Bienestar ta tene djasabra awor 13 di yanüari un Foro na Universidat di Kòrsou durante kua lo informá i interkambiá tokante di e proseso ku a tuma lugá pa yega na desishonnan relashoná ku suèldo mínimo.

Minister pa Desaroyo Sosial, Labor i Bienestar, ing. Hensley Koeiman, lo informá di e proseso i trayekto ku a kana pa yega na desishonnan balansá i responsabel relashoná ku e tema. Tambe lo duna informashon tokante e trayekto ku lo sigui kana pa asina garantisá ku tur hende por haña un entrada hustu pa kumpli ku su nesesidatnan básiko.

Banda di e informashon di Minister Koeiman lo tin presentashonnan tambe di representantenan di: Ministerio pa Desaroyo Ekonómiko (M.E.O.), Banko Sentral di Kòrsou i Sint Maarten, Konseho Sosial Ekonómiko (S.E.R.) i Buró Sentral pa Estadístika (C.B.S.) E instansianan menshoná lo duna informashon i dato relevante ku a aportá na e proseso di toma di un desishon balansá pa loke ta trata suèldo mínimo pa 2017 i 2018. Despues di e presentashonnan lo tin un foro habrí pa interkambiá di informashon i punto di bista riba suèldo mínimo.

E foro lo tuma lugá den Oula di Universidat di Kòrsou djasabra awor 13 di yanüari 2018 di 9.30 pa 11.30 di mainta. Entrada ta gratis pero ta rekomendá pa konfirmá presensia via number di telefòn 434-0314 òf koreo elektróniko : mirieta.lourens@gmail.com. Esaki pa garantisá bo asiento.

Ku asistensia amplio i partisipashon den un ámbito di diskushon sano i positivo, huntu lo mester yega na un vishon i maneho duradero pa bienestar general di nos komunidat.

Ministerio konserní

Bo opinion