Notisia

Gobièrnu di Kòrsou a firma akuerdo ku Fundashon Marshe

Geplaatst op 20 Novèmber 2018 dor di Ministerio di Desaroyo Ekonómiko

Willemstad- Minister di Desaroyo Ekonómiko, sr Steven Martina a firma un akuerdo di atministrashon Ku Fundashon Marshe na nòmber di Gobièrnu di Kòrsou relashoná ku aktividatnan di marshe den sentro di siudat.

Djamars dia 20 di novèmber 2018 Minister Martina a firma un akuerdo na nòmber di Gobièrnu di Kòrsou ku Fundashon Marshe. E akuerdo aki ta trata e atministrashon di tur aktividat di marshe ku ta tuma lugá na e momentunan aki den nos sentro di siudat. Pa medio di e akuerdo aki pues, Gobièrnu di Kòrsou a hasi traspaso ofisial di tur responsabilidatnan atministrativo di e edifisio di plasa nobo, plasa bieu, edifisio di plasa na Otrobanda, tur stand den sentro di siudat ku ta propiedat di Gobièrnu di Kòrsou i e kioskonan na Sha Caprileskade.
Fundashon Marshe ofisialmente a keda enkargá pa medio di e akuerdo aki ku entre otro hür i kobransa di hür di e diferente lokalidatnan ariba menshoná, trabounan di mantenshon chikitu ku mester tuma lugá na esakinan, kontakto ku i supervishon di e hürdó, i e atministrashon di e lokalidatnan aki na nòmber di gobièrnu. 
Di parti di Gobièrnu di Kòrsou e sektor Empresarial di Ministerio di Desaroyo Ekonómiko lo tin e enkargo di keda supervisá kumplimentu di e akuerdo aki.
E akuerdo a keda firmá pa durashon di tres (3) aña. Na terminashon di esaki lo hasi evaluashon i eventualmente lo bolbe firma un akuerdo nobo na su debido tempu.

Ministerio konserní

Bo opinion