Notisia

Gobièrnu di Kòrsou i NGO nan ta trahando di forma integral na kombatimentu di violensia

Geplaatst op 31 Òktober 2019 dor di Ministerio di Desaroyo Sosial, Labor i Bienestar

Willemstad – E grupo di trabou ku ta atendé ku Kòrsou su Plan Nashonal pa kombatí Violensia den vários forma ta trahando di forma integral riba e problema di violensia den nos komunidat. Konseho di Minister a ratifiká e plan aki na aña 2018 i awor e plan ta den pleno ehekushon. Riba 25 di novèmber próksimo lo tin un mini konferensia pa profeshonalnan tokante kon pa atendé ku sospecho di violensia òf kasonan di violensia konfirmá.

Violensia ta sin mas un problema serio den nos komunidat. E seriedat di e problema ta sintá mas ku nada den e echo ku violensia ya tin un karakter króniko i ta manifestando su mes den diferente tipo di situashon. E Plan Nashonal aki ta atendé netamente ku violensia kaminda mucha i hóben ta e víktima, pero tambe violensia den esfera relashonal i violensia doméstiko. Tur sifra disponibel ta indiká ku e situashon ta sumamente alarmante i ademas gobièrnu i NGO nan ta konsiente ku e sifranan no ta ni sikiera reflehá e situashon real, ya ku tin sospecho ku vários kaso di violensia no ta yega na un instansia kaminda ta registrá esaki nan.

Pues, ta ku un sentido di deber fuerte Konseho di Minister a ratifiká e plan aki na aña 2018. E struktura segun kua ta manehando ehekushon di e plan ta konsistí di 4 grupo di trabou: Sosial, Enseñansa, Salú i Hustisia. E 4 gruponan aki ta traha bou di guia di e kordinadó general, kende ta un representante di Sektor Famia i Hubentut di Ministerio di Desaroyo Sosial, Labor i Bienestar. Ademas, tin un Komishon Permanente ku ta konsistí direktornan di maneho di e 4 ministerionan enbolbí i di 4 NGO tambe. Pues, tantu sektor gubernamental komo sektor no-gubernamental ta enbolbí den ehekushon di e plan.

Kada grupo di trabou i kada NGO tin su propio aktividatnan ku e ta ehekutando den kuadro di e plan. Kombatimentu di violensia ta algu ku ningun sektor den nos pais no por hasi su so. Tur sektor mester kolaborá pa e esfuersonan por tin impakto i pa e resultadonan ta duradero. P’esei, un di e tareanan prinsipal den kuadro di e plan ta pa sinkronisá e trabounan ku ta tuma lugá pa asina maksimisá e esfuersonan individual di kada organisashon sea gubernamental òf no gubernamental.

Aktualmente ya tin basta tempu ku e gruponan di trabou ta trahando riba diferente komponente importante den kombatimentu di violensia. Por repartí e diferente aktividatnan den e siguiente kategorianan: konsientisashon, atkisishon di konosementu, maneho i legislashon i kuido (“hulpverlening”). Sigur ora papia di maneho ta papia den idioma tantu preventivo komo represivo. Ya tin un tempu kaba sin embargo ku tin un komponente mas ku Kòrsou, den kuadro di su kolaborashon ku tur otro isla i pais den Reino, ta bai duna prioridat apsoluto pa por traha riba dje. Ta trata aki di un protokòl pa por atendé ku e aspekto di mèldumentu di sea sospecho di òf violensia (den ki forma ku ta) konfirmá. Esaki ta un proyekto enorme, pa kua Kòrsou a bin ta prepará un tempu kaba. Por spera mas informashon tokante e proyekto aki durante promé kuartal di 2020. E resultado prinsipal ku Kòrsou ke logra ku esaki ta un aserkamentu muchu mas organisá i profeshonal pa atendé ku kasonan di (sospecho) di violensia. Lo e bira un método segun kua tur profeshonal lo traha, pa por duna mihó sosten na tantu víktima komo agresor.
E aktividatnan ku ta ehekutando komo parti di e plan ta bastante, pero tur ta kai bou di un di e kategorianan menshoná. Sin kita krédito for di kada un di e aktividatnan balioso aki ta bale la pena menshoná komo ehèmpel e proyekto pa traha riba “restorative justice”: un inisiativa pa atendé ku e agresor tambe i no solamente ku e víktima. Tin un kantidat di otro inisiativa mas ku ya kaba ta den ehekushon pa vários grupo di enfoke, sin embargo, gobièrnu ke mustra riba e aserkamentu integral ku e plan konosé i p’esei ta hasi menshon di esun ehèmpel aki pa ilustrá. Tin un lista disponibel di tur aktividat ku a i/òf ta tumando lugá. Por yama e siguiente numbernan pa haña akseso na e lista aki: 434 04 25, 434 04 28 òf 434 04 51.

Dia 25 di novèmber awor lo tin un mini-konferensia pa profeshonalnan ku di un òf otro forma ta atendé ku violensia komo parti di nan trabou diario. E mini konferensia aki ta tuma lugá riba Dia Internashonal pa Eliminashon di Violensia kontra Hende Muhé. E mini konferensia ta pa profeshonalnan i pues no pa públiko en general, pero e gruponan di trabou ta trahando riba inisiativanan pa konsientisashon di henter nos komunidat. Komo parti di e inisiativanan aki lo tin aktividat netamente pa públiko en general tambe. Durante luna di novèmber lo tin vários aktividat dirigí spesífikamente riba mucha i hóben i nan mayornan, pero lo sigui duna informashon tokante e aktividatnan kaminda públiko en general por partisipá.

Pa mas informashon por yama 434 04 25/ 434 04 28 / 434 04 51.



Ministerio konserní

Bo opinion