Notisia

Gobièrnu di Kòrsou: Optimalisá finansa públiko ta responsabilidat di nos tur.

Geplaatst op 12 Mart 2019 dor di Ministerio di Finansa

Willemstad – Durante reunion públiko di Parlamentu djaluna 11 di mart Minister di Finansa, Sr. Gijsbertha, a duna un presentashon tokante e ahustenan nesesario ku Gobièrnu di Kòrsou ta bai tuma pa optimalisá Finansa Públiko di Kòrsou den e periodo benidero. Promé Minister Rhuggenaath i Minister di Salubridat Públiko, Naturalesa i Medio Ambiente, Sra. Camelia-Römer, Minister di di Maneho di Gobernashon, Planifikashon i Servisio Públiko, sr. Konket i Minister di Desaroyo Sosial, Labor i Bienestar, sr. Koeiman tambe tabata presente.

Liña kòrá di e presentashon tabata mas ku evidente, esta ku e ahustenan presentá ta inevitabel i áltamente nesesario pa yuda Kòrsou drecha su situashon finansiero. Ta premirá, si no tuma ningun akshon alternativo, ku e défisit (diferensia entre entrada i gastunan total) durante 2019 lo sigui krese astronómikamente. Konsekuensia serio di esaki ta ku e défisit total na fin di aña lo ta por lo ménos 127 mion florin ku tin ku bai kubri. Na 2020 esaki lo bira 159 mion i na 2021 asta 188 mion florin.

Na diferente momentu durante su presentashon, Minister Gijsbertha a trese dilanti e importansia pa yega na un otro forma di pensa i aktua ora ta trata di manehá nos finansa públiko. E ta eksihí un kambio di mentalidat riguroso, no solamente pa Gobièrnu pero tambe pa komunidat kompleto. Solamente di e forma akí, implementando solushonnan inovativo, struktral i duradero, por yega na rekuperá un presupuesto. Esaki basá riba e meta ku nos ekonomia mester floresé kontinuamente.

Ta bai tin ahustenan tantu riba término kòrtiku komo término largu. Kambionan ku ta bai tuma lugá pronto ta enserá subida di algun impuesto i akseins i retiro boluntario di empleadonan públiko ku edat 60 òf mas. Gobièrnu a bin ta tuma diferente pasonan tambe último tempu pa redusí gastunan inesesario den e aparato públiko dor di e.o. modernisá i alsa efisiensia. Entre otro ta tumando akshonnan konkreto riba tereno di Salubridat Públiko pa yega na un ekonomisashon di sigur 84 mion florin.

Pa informá komunidat debidamente tokante e diferente ahustenan, Gobièrnu di Kòrsou ta bai lansa un kampaña di komunikashon. E kampaña aki alabes mester bai konsientisá pueblo tokante e vários formanan ku por kontribuí na optimalisashon di e situashon finansiero di Kòrsou. Lema di e kampaña, kual ta “Keda sin hasi nada, no ta un opshon”, den e kaso aki ta papia pa su mes. Optimalisashon di finansa públiko di Kòrsou ta responsabilidat di nos tur.

Ministerio konserní

Bo opinion