Notisia

GOBIERNU DI KÒRSOU TA FIRMA AKUERDO FINANSIERO HUNTU KU 11 OTRO PAIS PA UN FONDO DI 40 MION EURO

Geplaatst op 29 Òktober 2018 dor di Ministerio di Asuntunan General i Promé Minister

Philipsburg - ‘Caribbean OCT’s Resilience Summit’, ouspisiá pa Gobièrnu di Sint Maarten den kolaborashon ku Union Oropeo, a tuma lugá na Sint Maarten 25 òktober último. E promé summit aki, subtitulá ‘Unite-Prepare-Adapt’ a marka e komienso di e programa regional Karibense kaminda a trata e 3 temanan di: ‘Resilience (resiliensia), Marine Biodiversity (biodiversidat marino) i Sustainable Energy (energia sostenibel).

Durante e summit aki 12 pais partisipante a firma e programa di Union Oropeo, ku ta pone 40 miòn Euro disponibel di e European Development Fund (EDF) pa e 12 paisnan Karibense aki por usa e fondo den e proximo 5 añanan pa traha riba e 3 areanan. E programa ta relatá na e agenda di desaroyo di Union Oropeo ku ta konsentrá riba entre otro na enpoderashon di komunidatnan.

Promé Minister di Kòrsou Eugene Rhuggenaath representando Gòbiernu di Kòrsou, a firma e akuerdo di finansiamentu ku Union Oropeo pa por inisiá ku e implementashon. Ta trata di 40 miòn EURO di kual 12 teritorionan Karibense ta benefisiá, ku ta Anguilla, Aruba, Bonaire, British Virgin islands, Cayman Islands, Curaçao, Montserrat, Saint-Barthélemy, Sint-Eustatius, Sint-Maarten i Turks and Caicos Islands. E montante di 40 mion aki ta forma parti di e di 11 fondonan oropeo di desaroyo (11th EDF).

E fondonan ta destiná pa: invertí den mas efisiensia den uso di energia, energia sostenibel; pa protekshon di nos biodiversidat marino, kaminda ta konsentrá riba medioambiente i preservashon di nos ekosistema i su espesienan; i tambe pa fortifiká resiliensia, esta mehorá preparashon, resistensia di nos komunidat pa desafionan kousá pa entre otro dor di kambio di klima, kambionan (òf shòk) den ekonomia (regional i internashonal) i sirkumstansianan sosial. Resiliensia ta e forsa ku un pais tin pa rekuperá despues di un krisis. Esaki por nifika un desaster natural manera un orkán pero tambe un krisis ekonòmiko of migratorio den regiòn.

Temanan manera unifiká, prepará i adaptá tabata sentral durante e summit. A hiba palabra diferente líder i profesional den e areanan ya menshoná, manera Banko Mundial i representante di e agensia di implementashon di e programa kual ta ‘Expertise France’. Tambe a tuma lugá diskushonan di panel tokante e tres temanan di e summit. Al final por a konkluí ku individualmente kada teritorio tin avanse riba e 3 areanan di konsentrashon i ku konhuntamente nos por multipliká esfuersonan, resultado i konsekuentemente impakto na bienestar di interes general.

Durante e summit tambe Promé Minister Rhuggenaath a tene un bilateral ku e Direktor di e Direktorado-General pa kolaborashon internashonal i desaroyo na Komishon Oropeo ku responsabilidat di Karibe i Latino Amerika, sra. Jolita Butkeviciene. Progresonan di e trabounan den e barionan di Kortijn, Nieuw Nederland, Sapaté i Tera Cora a keda entre otro ilustrá pa medio di un video kòrtiku.

Tin palabrashon ku Kòrsou lo ta anfitrion di e di proksimo ‘resilience summit’ kual ta planiá pa tuma lugá na 2020.

E delegashon di Kòrsou tabata konsistí di Promé Minister Eugene Rhuggenaath, sra. Claudine Merkies, konsehero hurídiko i sra. Judric Pietersz enkargá ku asuntunan relatá ku fondonan di Union Oropeo.

E relashon ku Union Oropeo ta kai bou di responsabilidat di Minister di Asuntunan General i Gobièrnu di Kòrsou ta keda vigilá i kontribuí na mehorá kondishon di bida di e pueblo di Kòrsou.

Ministerio konserní

Bo opinion