Notisia

Gobièrnu di Kòrsou ta lamentá ekspreshonnan di minister Stef Blok

Geplaatst op 19 Yüli 2018 dor di Ministerio di Asuntunan General i Promé Minister

Willemstad - Gobièrnu di Kòrsou ta lamentá profundamente e ekspreshonnan di Minister di Asuntu Eksterno, sr. Blok, ku den e kalidat ei tambe ta minister di Reino, tokante komunidatnan multikultural. Gobièrnu na niun manera no por haña su mes den e ekspreshonnan ei, ku ta toka na un manera hopi profundo e núkleo di nos komunidat.

Ta netamente nos diversidat ta hasi nos fuerte. Komo Kòrsou nos ta orguyoso di e hecho ku nos komunidat ta konsistí di hende for di tur parti di mundu, ku ta biba banda di otro den pas i harmonia, no opstante e diferenshanan den origen di etnisidat i religion. Nos ʹunion den diversidatʹ ta algu ku nos ta trata ku hopi kariño na Kòrsou i ku nos a kaba di selebrá resientemente durante di nos Dia di Bandera.

Gobièrnu di Kòrsou kier a enfatisá ku minister Blok ta representá tambe kuater pais multi etniko, multireligioso i multikultural den Reino, den nos relashonnan eksterno. E ekspreshonnan di minister Blok no ta representativo pa e realidat den e parti Karibense di Reino. Al kontrario. Den nos opinion, e komunidat multikultural di Kòrsou, ta duna hustamente un mihó bista di norma i balor, manera hustisia, toleransia i libertat, ku nos ta repartí den Reino i ku ta hasi e kuater pais uní den un Reino, hustamente úniko.

Kamerbrief uitspraken Minister Blok tijdens besloten bijeenkomst Touch Dutch Base - 2018

Ministerio konserní

Bo opinion