Notisia

Gobièrnu huntu ku F.M.S. ta preparando paketenan di buki pa alumnonan

Geplaatst op 1 Ougùstùs 2018 dor di Ministerio di Enseñansa, Siensia, Kultura & Deporte

Fundashon Material pa Skol (F.M.S.) ku ta enkargá ku e Proyekto Enseñansa Liber ta mira atras riba un seri di trabou importante ku a tuma lugá i ta informá ku nan trabounan pa alumnonan por risibí nan pakete di buki pa e aña eskolar nobo ta kanando segun plan.

Preparashon
Tin un seri di trabou intensivo ku ta tumando lugá aktualmente na FMS ku ta enserá e.o. skènmentu di e bukinan ku ta keda hinká den e pakete ku ta bai pa alumnonan. Inkluso entrega di e bukinan ku ta biniendo a bordo di e 3 barkunan for di Hulanda na e diferente skolnan riba nos isla.

Kuido di buki
Anteriormente ya FMS a risibí bèk e bukinan usá i por konstatá si ku e kuido di e bukinan a bai atras kompará ku añanan anterior kaminda ta tin un kampaña intensivo di FMS pa mustra riba e importansia i responsabilidat di kada alumno pa kuida e bukinan ku nan ta haña. Naturalmente esnan ku kibra e bukinan aki intenshonalmente o keda sin entregá nan tin di paga e suma korespondiente inkluso un but. Ta na su lugá pa rekordá tur alumno/studiante i nan mayornan riba e importansia di e kuido di e bukinan ku nan ta haña pa asina por usa e bukinan aki pa mas tempu posibel. E ta benefisioso pa mayornan ku no tin nodi di paga pa bukinan dañá i kibrá.  Tambe Gobièrnu di Kòrsou por hasi mihó uso di e bukinan pa un periodo di tempu mas largu, loke ta nifiká ku e ta skapa gastunan innesesario pa remplasá bukinan kibrá i dañá.

--
KOMUNIKASHON
Ministerio di Enseñansa, Siensia, Kultura & Deporte

***Riba e potrètnan athunto por tuma nota di e trabou di preparashon na F.M.S.

Ministerio konserní

Bo opinion