Notisia

Gobièrnu ta deklará aña 2019: aña di piano di silinder: Ka'i Òrgel

Geplaatst op 4 Sèptèmber 2018 dor di Ministerio di Enseñansa, Siensia, Kultura & Deporte

Gobièrnu di Kòrsou resientemente, den kuadro di promové nos kultura riku i diverso, a dekretá aña 2019 komo e aña di e piano di silinder: Ka'i Òrgel.


Kultura ta un di e pilánan esensial pa konstruí nos nashon (‘nation building’). Ta di importansia pa nos fortifiká nos propio identidat i balornan propio, poniendo énfasis riba nos historia i kultura. Ora nos konosé nos historia i kultura, nos ta deskubrí nos potensia komo un nashon i por skohe konsientemente pa e lokual ku ta hasi nos fuerte. Di e forma aki huntu nos ta realisá e nashon ku nos ta deseá.

Aktualmente nos maneho kultural, ta pone énfasis riba Union den Diversidat. Nos historia riku ta duna un refleho bibu di e mosaiko kolorido i diverso di gran balor ku nos tin. Kòrsou su komunidat ta konsistí di diferente nashon, rasa, kultura ku ta meskla ku otro. Gobièrnu ta pone énfasis riba e tradishonnan ku ta mara nos huntu, pa konsolidá i fortifiká nos lasonan ku otro.

Den kuadro di ‘nation building’ gobièrnu aktualmente ta pone e aksènt riba e siguiente prioridatnan:
A. konsientisashon di nos komunidat di nos historia riku den e konteksto korekto;
B. promoshon di ekspreshon kultural;
C. promové mas arte i kultura den nos skolnan.

Gobièrnu ta sigui krea mas atenshon pa nos historia lokal i mas konsiensia históriko i kultural di e komunidat kurasoleño pa ku e siguiente generashonnan. Gobièrnu ta sigui mustra riba e importansia di i ta traha riba dokumentashon di nos historia kultural pa esaki keda bibu. Den e kuadro aki e enfoke pa e siguiente aña ta riba músika i historia di músika di Kòrsou, kaminda ta pone aksènt riba e piano di silinder "Ka'i Òrgel"/ Silinder piano/ Barrel Piano/ kaha di músika.

****************************************************************

Ministerio konserní

Bo opinion