Notisia

Gobièrnu ta firma akuerdo pa Desaroyo di área Coral Cliff na Santa Martha

Geplaatst op 4 Desèmber 2018 dor di Ministerio di Tráfiko, Transporte i Planifikashon Urbano

avila

Willemstad – Djamars 4 di desèmber, Gobièrnu di Kòrsou a firma un akuerdo importante ku kuater kompania lokal pa desaroyo di e área di Coral Cliff na Santa Martha. Huntu ku esaki, Minister Jesus- Leito a firma tambe e Desishon Ministerial pa e propietarionan nobo risibí e terenonan konserní den forma di èrfpagt. E plan di desaroyo ta konsistí di tres hotèl ‘eco friendly’ di 700 kamber na tur i tambe un marina. Alabes, lo renobá e playa ku habitantenan lokal sa hasi uzo di dje einan, manteniendo e akseso liber i grátis pa un i tur.

Despues ku Sunset Waters a sera su portanan na aña 2009 no a desaroyá e área mas i poko poko el a keda pèrdè su balor. Ku ideanan inovativo den mente, famianan Vogels i van Alstede a tuma e desishon pa kumpra loke ya pa hopi tempu ta un ruina aya na Coral Cliff i desaroyá esaki den un área turístiko. Gobièrnu di Kòrsou ta sumamente kontentu di por emití e kuater parselanan en kuestion den forma di èrfpagt na e desaroyadónan, ku mira riba un futuro muchu mas briante pa turistanan i habitantenan lokal ku lo bishitá e área den futuro.

Ta asina ku lo konstruí e hotèl i marina den diferente fase, mirando ku ta un desaroyo relativamente grandi. Esaki lo tin un durashon total di 10 aña. Por konta sigur ku kuponan nobo di trabou pa habitantenan di Soto, Barber i besindario, i tambe pa personanan ku nesesidat speshal di Tayer Sosial Santa Martha. Meta ta pa e hotèl yega na 700 kamber, sinembargo ya e promé fase lo ta kla aki tres aña i lo konsistí di 200 kamber. Lo traha mas ku klaro riba renobashon di e infrastruktura tambe, fasilitando bishitantenan pa yega na e hotèl, e marina i tambe e laman. Renobashon di e infrastruktura lo sosodé den estrecho koperashon ku Gobièrnu di Kòrsou.

Na e okashon aki, tabata t’ei presente Minister Zita Jesus Leito kende a firma e Desishonnan Ministerial pa emití e kuater parselanan konserní den èrfpagt. Minister Steven Martina tambe a hiba palabra mustrando su sosten pa ku e desaroyo turístiko aki.

 

Ministerio konserní

Bo opinion