Notisia

Gran Apertura di Aña di Ka’i Òrgel

Geplaatst op 14 Yanüari 2019 dor di Ministerio di Enseñansa, Siensia, Kultura & Deporte

Ka’i Òrgel ta parti integral tangibel di nos kultura. Kultura ta e base pa desaroyo di un komunidat. E ta alabes un instrumento importante pa edifikashon di pais (‘nation building’). Den e kuadro aki e afan di gobièrnu ta pa yuda desaroyá siudadanonan i famianan fuerte, responsabel, konsiente, kapas i dispuesto pa kontribuí na desaroyo di nos pais den tur su fasetanan!

Gobièrnu ta di opinion ku ta di vital importansia pa fortifiká e balor propio di nos hendenan. Solamente ku konosementu di su historia i kultura, e siudadano por skohe konsientemente pa e kosnan ku ta hasié fuerte, i asina realisá e nashon ku e ke. Kòrsou konosé un historia kultural tangibel pero tambe intangibel, ku ta hasi di nos kultura i nos komunidat un mosaiko kultural i diverso riku. Gobièrnu ta pone énfasis riba “union den diversidat” i e lokualnan ku ta mara nos huntu i fortifiká nos lasonan un pa ku e otro.

Gobièrnu ta hasi esaki dor di:
• Kreashon di un konsenshi históriko i kultural ku ta kontribuí na desaroyo di nos balornan propio i mas rèspèt pa nos mes;
• Fomentá mas interes pa nos historia, nos herensia kultural i nos ekspreshonnan kultural dor di promové dokumentashon di nos historia kultural riba tur nivel;
• Promoshon di mas apresio pa nos propio akto i logronan dor di fomentá mas sentido di responsabilidat, fortifiká nos propio identidat, yega na norma i balornan mas fuerte i alsa e nivel di e sentido síviko.

Kultura ta un di e pilánan esensial pa konstruí nos nashon (‘nation building’). Den e kuadro aki e enfoke pa e aña aki ta riba músika i historia di músika di Kòrsou, kaminda ta pone aksento riba e piano di silinder “Ka’i Òrgel”/ Cilinder piano/ Barrel Piano/ Caja de música.

Músika ta konektá nos ku universo, e ta duna nos mente ala, e ta duna alimento na nos imaginashon, i bida na tur kos. Músika ta e idioma ku no ta papia den ningun palabra partikular, músika bo ta bib’é i sinti’é! Musiká ta papia den término di emoshon, i si e ta den nos alma, ta den nos alma e ta!

Awe nos ta yama danki i duna balor na tur esnan ku a i ta tene e historia kultural musikal aki bibu i ku ta keda alimentá nos alma i habri nos kurasonnan!

Un felis aña di Ka’i Òrgel!

 

Ministerio konserní

Bo opinion