Notisia

HASI PETISHON PA BO PÈRMIT PA POR BENDE KOS RIBA RUTANAN DI KARNAVAL 2019

Geplaatst op 14 Yanüari 2019 dor di Ministerio di Desaroyo Ekonómiko

WILLEMSTAD- Ministerio di Desaroyo Ekonómiko kier rekordá tur persona ku kier bende produkto riba un òf ámbos ruta di karnaval 2019 (Bándariba i/òf Bándabou) ku mester dispone di un pèrmit temporal bálido pa por hasi esaki.

 

Personanan ku ta kumpli ku tur e rekisitonan preskribí i ku kier bende algu riba ruta di karnaval 2019 ya por hasi petishon pa un pèrmit temporal. Si akaso bo ta deseá di bende kos di forma ambulante bo mester hasi petishon pa un ‘ventvergunning’ temporal i si akaso lo bo ke bende kos for di un puesto fiho lo bo mester di un ‘standplaatsvergunning’ temporal.
Pa por entregá un petishon mester tin tur e siguiente rekisitonan na òrdu.
Tur persona mester trese un identifikashon bálido di su mes i di kada asistente ku lo laborá huntu kuné. Si akaso e petishonario òf unu di su asistentenan ta estranhero mester presentá tambe kopia di un pèrmit di estadia òf kopia di e petishon pa un pèrmit nobo. Huntu ku esaki mester trese un sertifikado di salú di e bendedó, (tur asistente mester tin nan karchi di kùr di G&Gz (ántes GGD) durante e evento), komprobante di pago pa e pèrmit, komprobante di pago di prekario, kopia di reibeweis, karchi di kùr i resibu di seguro i papel di number di outo (e último aki ta konta solamente pa esnan ku kier bende kos di forma ambulante).

Na momentu di entrega di e pèrmit ta pidi tambe un stampia na balor di     Fls. 10,- pa e ventvergunning i Fls. 20,- pa e standplaatsvergunning.

Pa por hasi petishon pa ámbos pèrmit (vent- òf standplaatsvergunning temporal) pa temporada di karnaval 2019 mester akudí durante oranan di ofisina na Lokèt di Pèrmit na Saliña 127 pegá ku Subway.

Tuma nota ku personanan ku ya ta bende kos riba e ruta di karnaval mester hasi petishon tòg pa por risibí un pèrmit spesífiko pa karnaval 2019. Tin posibilidat te ku djabièrnè 01 febrüari 2019 pa por entrega petishon pa un pèrmit.
Pa mas informashon un i tur por tuma kontakto libremente ku Lokèt di Pèrmit na tel. 433-3123 òf 0800-1515.

Ministerio konserní

Bo opinion