Notisia

Historia di Kaha di òrgel i Shon Roos

Geplaatst op 28 Aprel 2019 dor di Ministerio di Enseñansa, Siensia, Kultura & Deporte

Minister di Enseñansa, Siensia, Kultura & Deporte sra. Marilyn Alcalá-Wallé a hasi un bishita serka sra. Rosarita Fecunda-Gosepa, Shon Roos, ku ta e promé hende muhé ku a kumpra un Kaha di Orgel na Kòrsou. E nòmber di su Kaha di Orgel tabata yama “Mi Tesoro” i e pick-up ku ela kumpra pa transportá e Kaha tambe ela duna un nòmber: “Doña Juana”.

Shon Roos mes tabata organisá bailenan di Kaha di Orgel den forma ordènt, kaminda kada persona tabata risibí su invitashon di forma personal. Kabayeronan mester a bisti tur na flus i damanan shimis maxi ku flor den kabei. E tabata organisá e baile di tal manera ku kada un invitadó tabata haña e oportunidat di baila.
E bailenan tabata tuma lugá na kas di Shon Roos mes.

Despues ku tempu tabata transkurí i Shon Roos a gana basta mas edat ela bende su Kaha di Orgel.

Den kuadro di e Aña di Kaha di Orgel, Minister Alcalá-Wallé a honra Shon Roos ku un plaka di mérito pa su trabou i esfuersonan pa tene nos historia musikal di Kaha di Orgel bibu. Huntu ku famianan a konmemorá e kontribushon balioso di Shon Roos na nos Kaha di Orgel!

Pabien

--

KOMUNIKASHON

Ministerio konserní

Bo opinion