Notisia

Hulanda ta pone fondonan disponibel pa ayudo tékniko na Kòrsou

Geplaatst op 6 Sèptèmber 2019 dor di Ministerio di Asuntunan General i Promé Minister

WILLEMSTAD – Den kuadro di e situashon krítiko na Venezuela ku den e último añanan a resultá den un impakto grandi riba situashon sosial-ekonómiko i di salubridat di Kòrsou, Gobièrnu di Kòrsou a entregá dia 10 di yanüari 2019 un petishon pa ayudo tékniko di Hulanda. Esaki a resultá resien den desishon di Gabinete, esta Gobièrnu di Hulanda, pa pone fondonan disponibel pa yuda Kòrsou riba tereno di maneho di riesgo i asina mitigá e problemátika akí.

A base di un pakete di sosten kaminda ta tene ampliamente kuenta ku prioridatnan ku Kòrsou tin, lo bai pone fondonan disponibel dirihí riba fortifikashon di e fronteranan marítimo i optimalisashon di e kadena di stranhero, e asina yamá ‘vreemdelingenketen’. Banda di esei ta pone fondonan disponibel tambe pa proyektonan sosial riba tereno di enseñansa, salubridat i akohida di gruponan vulnerabel.

Den e último añanan Ministerio di Hustisia i prinsipalmente ‘vreemdelingenketen’ a enkontrá retonan grandi debí na e migrashon di Venezolanonan pa Kòrsou a konsekuensia di e krísis na nan pais. No opstante esaki a traha duru na un maneho di stranhero / migrashon i maneho di ‘EVRM 3’. Tambe a pone hopi atenshon na fortifikashon di e aparato atraves di entrenamentu. Sinembargo, e problemátika di stranhero agudo ta trese un peso grandi riba agènda di e Ministerio.

Na total Hulanda lo pone 23,8 mion Euro disponibel ku primeramente lo repartí proporshonalmente entre Kòrsou i Aruba. Pa loke ta trata Ministerio di Hustisia lo bin 2,2 mion Euro dipsonibel, kual lo yuda grandemente ku mehorashon di e infrastruktura hudisial i di akohida na por ehèmpel Sentro di Detenshon i Korekshon Kòrsou (SDKK). Alabes lo sigui introdusí mas programa di kapasitashon pa sigui fortifiká e aparato públiko.

Gobièrnu di Kòrsou ta sumamente satisfecho ku e desishon di Hulanda pa demostrá su disponibilidat pa duna sosten di forma konkreto. Gobièrnu lo sigui tuma e pasonan nesesario pa trese kambio positivo i duradero tantu riba nivel di gobernashon komo e diferente áreanan di akshon, ku ta benefisiá komunidat di Kòrsou.

Ministerio konserní

Bo opinion