Notisia

Instalashon di Komishon “Historia Sklabitut Kòrsou i e rebelion 225 aña pasá”

Geplaatst op 6 Sèptèmber 2019 dor di Ministerio di Enseñansa, Siensia, Kultura & Deporte

Willemstad- Resientemente e Komishon “Historia Sklabitut Kòrsou i e rebelion 225 aña pasá” a keda instalá dor di Minister di Enseñansa, Siensia, Kultura & Deporte (ESKD) sra. Marilyn Alcalá-Wallé.

Presidente di e komishon ta sr. Sergio Everon. Por lo demas tin representashon di un sekretario, departamento di maneho di ESKD, di direktivanan di skol, di skolnan públiko i dos eksperto riba tereno di historia ku ta sr. Charles do Rego i sra Rosemary Allen. E komishon aki ta aserká tur e diferente entidatnan ku ta traha riba e tereno aki pa nan partisipashon den e proseso.

E tareanan di e komishon ta pa inventarisá informashon tokante di e historia di katibu na Kòrsou den tur su fasetanan. A base di esei ta traha 10 “lesbrief” pa enseñansa di fundeshi, sekundario i di fishi pa Kòrsou. Den esaki ta importante alabes pa inkorporá e Monumentu “Desenkadená” diseña i trahá dor di nos artista Nel Simon i tambe e shete (7) monumentonan ku ta marka e “Kaminda di Resistensia”, diseñá pa Yubi Kirindongo. Alabes ta tene kuenta ku e “Siklo di Sklabitut (17 ougústus, 23 ougústus, 3 òktober, 2 dezèmber, 25 mart, 1 yüli).
E 10 “lesbrief”-nan ta trata:

  • e negoshi trans atlantiko di katibu;
  • sklabitut na Kòrsou;
  • 7 lesbrief tokante di e “Kaminda di resistensia”, e sitionan históriko mas importante kaminda e katibunan a hiba e lucha (Kenepa, Santa Cruz, Porto Mari, Saliña Sint Marie, Seri Negerat na plantashon Fontein, Savonet i Rif);
  • sklabitut Moderno.

Finalmente e komishon mester bini ku proposishonnan pa mas tardá 30 novèmber 2019 na Minister di ESKD pa konmemorá e 225 aña di e rebelion den 2020.

Riba e foto miembronan di e komishon huntu ku Minister.

Ministerio konserní

Bo opinion