Notisia

Instalashon miembronan pa Konseho di Enseñansa i Merkado Laboral/Raad van Onderwijs en Arbeidsmarkt (ROA)

Geplaatst op 9 Òktober 2019 dor di Ministerio di Enseñansa, Siensia, Kultura & Deporte

Pa promé biaha den historia di pais Kòrsou: Miembronan di ROA ta keda instalá dor di Minister Presidènt sr. Eugene Rhuggenaath den presensia di Minister di ESKD sra. Marilyn Alcalá-Wallé.

Willemstad – den su reunion di djarason 9 di òktober 2019, gabinete Rhuggenaath a bai di akuerdo ku e proposishon di Minister di Enseñansa, Siensia, Kultura i Deporte (ESKD), sra. Marilyn Alcalá-Wallé pa instalá e miembronan pa tuma asiento den e Konseho di Enseñansa i Merkado Laboral/ Raad voor Onderwijs- en Arbeidsmarkt (ROA). Konforme lei di enseñansa sekundario di fishi i edukashon (LANDSVERORDENING van de 22ste mei 2008 tot vaststelling van een regeling met betrekking tot het secundair beroepsonderwijs en de educatie), Gobièrnu mester instalá un órgano ku ta konsehá e minister tokante diferente tópiko ku ta regardá enseñansa di fishi (SBO).

E tarea primordial di e órgano aki ta entre otro pa duna konseho relashoná ku rekonosementu di estudionan i aprobá/òf kita rekonosementu pa ku kursonan di institutonan sekundario. Alabes nan ta duna konseho na Gobièrnu relashoná ku e konekshon entre enseñansa sekundario i merkado laboral.

E órgano aki ta konsistí di un kantidat di 7 miembro ku representantenan di organisashon di den enseñansa, merkado laboral, sindikal i gubernamental. E miembronan ta keda asesorá pa Bureau Secretariaat SER/ROA/GOA i ta traha den estrecho koperashon ku organisashon di maneho di Enseñansa, Siensia, Kultura & Deporte bou di guia di direktor di maneho sra. Susan Larmonie-Van Heydoorn.

E miembronan di ROA ta:
− Representante di komèrsio (dunadó di trabou): sra. Bionda Fonseca i sr. Ramond Jamanika;
− Representante di sindikato (trahadó): sr. Edward St. Jacobs i sr. Kenneth Valpoort;
− Representante di profeshonal di den enseñansa; sr. Ruud Thuis, sra. Melrose Cornelia-Ortela i sra. Feiijdi Narvaez-Ayubi.

E miembronan di ROA a keda ofisialmente instalá dor di Minister Presidènt sr. Eugene Rhuggenaath den presensia di Minister di ESKD sra. Alcalá-Wallé.

Ku esaki Gobièrnu ta traha konforme e lei di enseñansa sekundario di fishi i edukashon pa sinkronisá e kontenido di enseñansa mas mihó riba e nesesidatnan di merkado laboral. E merkado laboral i enseñansa sekundario di fishi ta bai haña mas atenshon i mihó akoplashon.


** riba e potrèt nan athunto por tuma nota di e momentu di instalashon di e miembronan den presensia di Minister Presidente sr. E. Rhuggenaath i Minister di Enseñansa, Siensia, Kultura & Deporte sra. M.Alcalá-Wallé.

--
KOMUNIKASHON
Ministerio di Enseñansa, Siensia, Kultura & Deporte

Ministerio konserní

Bo opinion