Notisia

Kambio den durashon di pèrmit di estadia

Geplaatst op 14 Desèmber 2018 dor di Ministerio di Hustisia

Den kuadro di revishon di e maneho pa ku atmishon di estranhero, Servisio di Atmishon ku entrante 1 di yanüari 2019 tin kambio den e durashon di un pèrmit di estadia.

Tur petishonario ku a entregá un petishon pa un pèrmit di estadia i ku ta bini na remarke pa risibí esaki, ta risibí un pèrmit ku balides di 1 aña. E petishonario aki ta sigui risibí un pèrmit bálido pa 1 aña te na momentu ku e ta bini na remarke pa un pèrmit pa tempu indefiní. Dependé di e kaso òf kondishon e petishonario por bini na remarke pa un pèrmit pa mas aña òf pa tempu indefiní.

Pèrmit ku balides di 2 òf 3 aña

Petishonarionan ku a risibí un pèrmit bálido pa 2 òf 3 aña bou di e maneho anterior ta keda risibí e kantidat di añanan aki te na momentu ku ta bini na remarke pa un pèrmit pa tempu indefiní.

Pèrmit pa  e petishonario kasá ku hulandes

Si ta trata di un petishonario ku tin ménos ku 5 aña kasá ku un persona di nashonalidat hulandes, e petishonario ta risibí un pèrmit bálido pa 1 aña. Na momentu ku e petishonario tin 5 aña òf mas kasá ku un persona di nashonalidat hulandes, e por bini na remarke pa un pèrmit bálido pa 5 aña. Esaki ta keda meskos ku e maneho anterior.

Pèrmit di estadia pa tempu indefiní

Pa un petishonario risibí un pèrmit di estadia pa tempu indefiní, e mester kumpli ku un di e siguiente puntonan:

  • Ta bini na remarke pa un pèrmit di invershonista pa tempu indefiní;
  • Ta biba na Kòrsou pa 10 aña siguí sin interupshon;
  • Ta bini na remarke pa e ”penshonado regeling’’
  • Yunan nasé na Kòrsou kual un di e mayornan tin un pèrmit pa tempu indefiní;
  • Personanan bibá aki promé ku aña 2000 ku no a bandoná Kòrsou i ku durante añanan tabatin un pèrmit i a haña interupshonnan mei mei di esakinan;
  • Personanan bibá na Kòrsou promé ku 2005 ku no a bandoná Kòrsou i ku e último 5 añanan ta bibando na Kòrsou sin interupshon di su pèrmitnan;

Gastunan mará na durashon

Personanan ku tin un pèrmit di trabou bálido pa mas ku 1 aña i kier bini na remarke pa un pèrmit di estadia pa e mesun kantidat di aña, mester paga e gastunan (leges en retributies) mará na e kantidat di aña pa kual ta pidiendo e pèrmit di estadia. Si e persona tin famia i kier pa e famia bini na remarke pa e mesun kantidat di añanan, mester paga e gastunan (leges en retributies) mará na e kantidat di aña.

Pa keda na altura di tur informashon, por bishitá nos  página di Facebook Toelatingsorganisatie Curaçao-Inmigrashon Kòrsou òf website di gobièrnu www.gobiernu.cw. Por tuma kontakto ku nos na telefòn 733-2000 òf manda un email na info@immigrationcur.org.

Ministerio konserní

Bo opinion